Home తాజా వార్తలు 200కి.మీ డబుల్ రైల్వేలైన్

200కి.మీ డబుల్ రైల్వేలైన్

Prabhakar Rao

 రైల్వే అధికారులను కోరిన ట్రాన్స్‌కో సిఎండి ప్రభాకర్‌రావు

దామరచర్లలో నిర్మిస్తున్న 4000 మెగావాట్ల అల్ట్రా మెగా పవర్ ప్లాంటుకు అవసరమైన బొగ్గు సరఫరా చేయడానికి అనుగుణంగా రైల్వే లైన్‌ను డబుల్ లైన్ గా మార్చాలని జెన్‌కో -ట్రాన్స్‌కో సిఎ ండి దేవులపల్లి ప్రభాకర్ రావు దక్షిణమధ్య రైల్వే అధికారులను కోరారు. దామరచర్ల పవర్ ప్లాంటుకు సింగరేణి నుండే మొత్తం బొగ్గును తీసుకోవాలని నిర్ణయించినందున కొత్తగూడెం నుండి డోర్నకల్ వరకు మోటమారి నుండి విష్ణుపురం వరకు 200 కిలోమీటర్ల మేర డబుల్ లేన్ నిర్మించాలని విజ్ఞప్తి చేశారు. దామరచర్ల పవర్ ప్లాంట్ నిర్మాణం శరవేగం గా సాగుతున్నదని, దాని మాదిరిగానే డబుల్ లైన్ నిర్మాణం, రైల్వే లైన్ పటిష్టం చేసే పనులు త్వరితగతిన చేపట్టాలని విజ్ఞప్తి చేశారు. దామరచర్ల, భద్రాద్రి, కెటిపిపి పవర్ ప్లాంట్లకు బొగ్గు రవాణా చేసేందుకు ప్రస్తుతం ఉన్న రైల్వే లైన్లు, భవిష్యత్తులో నిర్మించాల్సిన రైల్వే లైన్లపై సిఎండి ప్రభాకర్ రావు విద్యుత్ సౌధలో సోమవారం సమీక్ష నిర్వహించారు. దక్షిణమధ్య రైల్వే ప్రిన్సిపల్ చీఫ్ మేనేజర్ కె.శివప్రసాద్, చీఫ్ మేనేజర్ డి.నాగ్య, జెన్కో డైరెక్టర్లు నర్సింగ్ రావు, వెంకటరాజ్యం తదితరులు పాల్గొన్నారు.

డోర్నకల్ – విజయవాడ, బీబీనగర్ – నడికుడి లైన్లను కలుపుతూ కొద్ది కాలం క్రితం మోటమారి, విష్ణుపురం రైల్వే స్టేషన్ల మధ్య దక్షిణమధ్య రైల్వే సింగి ల్ లైన్ నిర్మాణం చేపట్టింది. ఆ మార్గం ద్వారానే నల్లగొండ జిల్లాలో వున్న సిమెంట్, లైమ్ స్టోన్స్ పరిశ్రమలకు బొగ్గు సరఫరా చేస్తున్నారు. విష్ణుపురంకు సమీపంలోనే వుండే దామరచర్ల విద్యుత్ ఉత్పత్తి కేంద్రానికి కూడా ఇదే లైన్ల నుంచి బొగ్గు సరఫరా చేయాలని దక్షిణమధ్య రైల్వే, జెన్‌కో నిర్ణయించాయి. అయితే ప్రస్తుతం ఉన్న సింగిల్ లైన్, దాని సామర్థం దామరచర్ల విద్యుత్ ప్లాంట్ కు అవసరమయ్యే భారీ మొత్తం బొగ్గును రవాణా చేయటానికి ఏ మాత్రం అనువుగా లేదని నిపుణులు తేల్చారు. దీంతో సింగిల్ లైన్‌ను డబుల్ లైన్‌గా చేయాల్సిన అవసరం ఉందని భావించిన జెన్‌కో దక్షిణ మధ్య రైల్వేను అప్రమత్తం చేసింది. డోర్నకల్ – విజయవాడ లైన్‌లోని మోటమారి నుండి బిబి నగర్ – నడికుడి మార్గంలోని విష్ణుపురం వరకు 100 కిలోమీటర్ల సింగిల్ లైన్ ఉంది. ప్రతి రోజుకు 5-6 రేక్స్‌కు మించి బొగ్గును రవాణా చేయలేదన్నారు. ఖాజీపేట – బల్లార్ష మార్గంలోని ఉప్పల్ నుండి ప్రస్తుతం భూపాలపల్లి పవర్ ప్లాంటుకు బొగ్గు సరఫరా జరుగుతోంది.

ఉప్పల్ రైల్వే స్టేషన్లో గూడ్స్ రైళ్లను ఆపి బొగ్గును దిగుమతి చేసి అక్కడ నుండి లారీల ద్వారా భూపాలపల్లి తరలిస్తున్నారు.ఈ లైన్ అత్యం త రద్దీ అయిన చెన్నై – ఢిల్లీ మార్గంలోనే ఉంది. ఉప్పల్‌లో అన్ లోడింగ్ వల్ల ఇతర రైళ్లకు ఇబ్బంది కలుగుతున్నదని దక్షిణమధ్య రైల్వే అధికారులు చెబుతున్నారు. దీనికి ప్రత్యామ్నాయంగా ఉప్పల్ నుండి భూపాలపల్లి వరకు ప్రత్యేక రైలు మార్గం నిర్మించడమో, లేదంటే ఉప్పల్ నుండి కొద్ది దూరం రైల్వే ట్రాక్ నిర్మించి డంపింగ్ యార్డు ఏర్పాటు చేసుకోవాలని రైల్వే, జెన్‌కో అధికారులు నిర్ణయించారు. దీనికి సంబంధించి కేంద్ర, రాష్ట్ర ప్రభుత్వాలకు సమగ్ర నివేదిక సమర్పించాలని నిశ్చయించారు.

Damacharla 4000 MW Ultra Mega Power Plant