ముంబాయి: అవసరాలను దృష్టిలో పెట్టుకుని ఎప్పటికప్పుడు సరికొత్త ఫీచర్స్ ని మన ముందుకు తీసుకొస్తున్న వాట్సాప్ సంస్థ మరో రెండు సరికొత్త సౌలభ్యాలను అందుబాటులోకి తీసుకొచ్చింది. ఇదివారకే వాట్సాప్ పేమెంట్స్‌ను అప్‌డేట్‌గా అందించిన ఈ సంస్థ…తాజాగా వీడియోకాల్ నుండి వాయిస్ కాల్‌కు మారే సౌలభ్యాన్ని అందుబాటులోకి తీసుకొచ్చింది. అయితే దీని ద్వారా వీడియో కాల్ నుండి వాయిస్ కాల్‌కు, వాయిస్ కాల్ నుండి వీడియో కాల్‌కు మారే సౌలభ్యం ఉంటుంది. కాల్ మాట్లాడుతున్నప్పుడు స్క్రీన్‌పై స్విచ్ ఆప్షన్ కనిపిస్తుంది. దాన్ని క్లిక్ చేస్తే అవతలివారికి మీరు వాయిస్ కాల్ నుండి వీడియో కాల్‌కు మారాలనుకుంటున్నట్లుగా నోటిఫికేషన్ అవతలివారికి వెళ్తుంది. దాన్ని అవతలివారు అంగీకరించగానే వాయిస్ కాల్ నుండి వీడియోకాల్‌కు మారిపోతారు. దీనితో పాటు గ్రూప్‌లో పోస్టు చేసిన మెసేజెన్‌లో రీడ్ చేయని వాటిని ‘@’ ని ఉపయోగించి తెలుసుకోచ్చు. అంతేకాదండోయ్ గ్రూప్‌లోని మరొకరిని మెన్షన్ చేస్తూ మెసేజ్ చేయచ్చు. అయితే ఈ అప్‌డేట్ కేవలం ఐఓఎస్ వినియోగదారులకు మాత్రమే అందుబాటులోకి తెచ్చింది. ఈ ఫీచర్స్‌ని ఉపయోగించుకునేందుకు లేటెస్ట్ అప్‌డేట్‌ను ఇన్‌స్టాల్ చేసుకోవాల్సి ఉంటుంది. వాట్సాప్ ఇటీవలే పేమెంట్స్ ఆప్షన్‌ను సైతం అందుబాటులోకి తెచ్చింది. అయితే ఇది బీటా యూజర్స్‌కు మాత్రమే లభిస్తోంది.