Home ఎడిటోరియల్ కేంద్రం గుప్పెట్లోకి బెంగాల్!

కేంద్రం గుప్పెట్లోకి బెంగాల్!

Political row erupts in bengal over move to extend BSF

 

పశ్చిమ బెంగాల్‌లోని ఉత్తర ప్రాంతమంతా బిఎస్‌ఎఫ్ ఆధీనంలోకి వెళ్ళిపోతోంది. బిజెపి, తృణమూల్ కాంగ్రెస్ మధ్య రాజకీయ రణరంగంగా మారిన ఈ ప్రాంతంలో తమ పార్టీకి అనుకూలంగా కేంద్రం ఈ నిర్ణయం తీసుకుంది. అంతర్జాతీయ సరిహద్దు నుంచి 35 కిలోమీటర్ల వరకు ఉన్న బిఎస్‌ఎఫ్ పరిధిని 50 కిలోమీటర్లకు పెంచుతూ బిఎస్‌ఎఫ్ చట్టంలో సవరణను తీసుకొచ్చింది. ఫలితంగా పశ్చిమ బెంగాల్‌లోని ఉత్తర ప్రాంతమంతా కేంద్రం అజమాయిషీలోకి వెళ్ళిపోతుంది. దీని వల్ల ఈ ప్రాంతంలో బిఎస్‌ఎఫ్ దళాలు స్థానిక పోలీసులకు సమాచారం ఇవ్వకుండానే గాలింపు చర్యలు చేపట్టవచ్చు, ఎవరినైనా నిర్బంధించవచ్చు. నేపాల్, భూటాన్ వెళ్ళడానికి ముఖద్వారం లాంటి సిలిగురి నగరం కూడా కేంద్ర హోంశాఖ మంత్రి అమిత్ షా ఆధ్వర్యంలో పనిచేసే బిఎస్‌ఎఫ్ ఆధీనంలోకి ఈ సవరణ ద్వారా వెళ్ళిపోతుంది. బెంగాల్‌లో కలకత్తా తరువాత పెద్ద నగరం సిలిగురి. ఒక్క పశ్చిమ బెంగాల్ రాష్ట్రానికి మాత్రమే 2,216.7 కిలోమీటర్ల అతిపెద్ద అంతర్జాతీయ సరిహద్దు ఉంది. ఈ రాష్ర్ట తూర్పు సరిహద్దు అంతా బంగ్లాదేశ్‌తోనే ఉండడం వల్ల, డార్జిలింగ్ కొండలలోని కుర్సియాంగ్ నుంచి బంగాళాఖాతం వెంబడి ఉన్న సుందరబాన్స్ వరకు బిఎస్‌ఎఫ్ పరిధి విస్తరించింది.

పాకిస్థాన్‌తో రాజస్థాన్‌కు 1,170 కిలోమీటర్లు, గుజరాత్‌కు 506 కిలోమీటర్లు, పంజాబ్‌కు 425 కిలోమీటర్ల అంతర్జాతీయ సరిహద్దు ఉంది. బంగ్లాదేశ్‌తో అస్సాంకు కేవలం 267.5 కిలోమీటర్ల సరిహద్దు మాత్రమే ఉంది. పశ్చిమ బెంగాల్‌లో ఉన్న 23 జిల్లాలకు గాను పది జిల్లాలకు బంగ్లాదేశ్‌తో సరిహద్దు ఉంది. ఈ రాష్ర్టంలో ఉన్న 42 లోక్‌సభ నియోజకవర్గాలలో సగం, అంటే 21 నియోజక వార్గాలకు బంగ్లాదేశ్‌తో సరిహద్దు ఉంది. “బంగ్లాదేశ్ సరిహద్దుకు 50 కిలోమీటర్ల పరిధిలోనే బెంగాల్‌లోని ప్రధానమైన పట్టణాలు, అనేక జిల్లా కేంద్రాలు ఉన్నందున వల్ల అవ్వన్నీ ఈ చట్ట సవరణ వల్ల బిఎస్‌ఎఫ్ పరిధిలోకి వెళ్ళిపోతాయి. ఏకపక్షంగా తీసుకున్న ఈ నిర్ణయం వెనుక ఒక రహస్య ఎజెండా ఉండబట్టే కేంద్ర ప్రభుత్వం ఒక సహేతుకమైన వివరణ ఇవ్వలేకపోతోంది” అని రాజ్యసభలో తృణమూల్ కాంగ్రెస్ చీఫ్ విప్, ఆ పార్టీ జాతీయ అధికార ప్రతినిధి సుకేందు శేఖర్ రాయ్ ఆరోపించారు. “ఈ నిర్ణయం తీసుకునేటప్పుడు ఇది జాతీయ ప్రయోజనాలకు సంబంధించినదైతే రాష్ర్ట ప్రభుత్వంతో ఎందుకు సంప్రదించ లేదు? భారతదేశం యూనిటరీ ప్రభుత్వం కాదు కదా! రాష్ర్ట ప్రభుత్వ అభిప్రాయాన్ని కేంద్ర ప్రభుత్వం పరిగణనలోకి తీసుకోలేదు.

ఈ చట్ట సవరణను ఏ పార్లమెంటులో అయితే చేశారో, ఆ పార్లమెంటులోనే మేం దీన్ని వ్యతిరేకిస్తాం” అని ఆయన స్పష్ట చేశారు. కేంద్ర ప్రభుత్వానికి, నాగా పీపుల్స్ ఫ్రంట్‌కు మధ్య నడిచిన వివాదంలో సుప్రీంకోర్టు (1997 నవంబర్ 27) ఇచ్చిన తీర్పును ఆయన ఇలా చేశారు. “కేంద్ర ప్రభుత్వ సాయుధ బలగాలు రాష్ట్రాలలో ఏవైనా చర్యలు చేపట్టాలంటే అక్కడి పౌర పరిపాలనాధికారులతో సంప్రదించి, వారి సహాయ సహకారాలతోనే చేపట్టాలి”. “సుప్రీంకోర్టు తీర్పుకు పూర్తి విరుద్ధంగా రాష్ర్ట పోలీసుల స్థానంలో సాయుధ పోలీసులను దించి రాష్ట్రానికి సంబంధించిన పౌర పరిపాలనాధికారులతో సంప్రదించడం లేదు. ఇది భారత దేశ ఫెడరల్ విధానానికి హాని చేసే ఏకపక్ష నిర్ణయం” అని సుకేందు శేఖర్ రాయ్ విమర్శించారు. కేంద్ర ప్రభుత్వం తీసుకున్న ఈ నిర్ణయాన్ని పంజాబ్ ముఖ్యమంత్రి చరణ్‌జిత్‌సింగ్ చన్ని తీవ్రంగా వ్యతిరేకిస్తూ, “ఇది ఫెడరలిజం పైన దాడి” గా అభివర్ణించారు. “రాష్ర్ట ప్రభుత్వం ఎందుకు అభ్యంతరాలు చెపుతోందో కారణాలు నాకు అర్థం కావడం లేదు. దేశ అంతరంగిక, సరిహద్దు భత్రతను పెంచడానికి బిఎస్‌ఎఫ్ పరిధిని పెంచవచ్చు.

ఒక్క పశ్చిమ బెంగాల్‌లోనే కాదు, అస్సాం, పంజాబ్‌లో కూడా ఈ మార్పులు చేశారు.” అని పశ్చిమ బెంగాల్ కూచ్ బిహార్ జిల్లాకు చెందిన కేంద్ర హోంశాఖ సహాయ మంత్రి నితీష్ ప్రామాణిక అన్నారు. పశ్చిమ బెంగాల్‌లోని ఉత్తర ప్రాంతమంతా బిఎస్‌ఎఫ్ పరిధిలోకి రావడం చెప్పుకోదగ్గ రాజకీయ పరిణామం. ఆరు నెలల క్రితం జరిగిన బెంగాల్ రాష్ర్ట ఎన్నికల్లో తృణమూల్ కాంగ్రెస్ తన బలాన్ని పెంచుకుని అధికారాన్ని తిరిగి కైవసం చేసుకున్నప్పటికీ, ఉత్తర ప్రాంతంలో మాత్రం బిజెపితో నువ్వా నేనా అన్నట్టు పోరాడాల్సి వచ్చింది. ఈ నేపథ్యంలో ఉత్తర బెంగాల్‌ను ప్రత్యేక రాష్ర్టంగా చేయాలనే వాదనను పలువురు బిజెపి నాయకులు లేవనెత్తుతున్నారు. జూన్‌లో జరిగిన భారీ మార్పులలో ఈ ప్రాంతంపై కేంద్ర ప్రభుత్వం ప్రత్యేక శ్రద్ధ కనబరచింది. రాష్ర్టం నుంచి నలుగురిని కేంద్ర మంత్రిమండలిలోకి తీసుకోగా, వారిలో ఇద్దరు రాష్ర్టంలో అయిదవ వంతు మాత్రమే ఉన్న ఉత్తర ప్రాంతం నుంచి వచ్చినవారు. ఈ ప్రాంతానికి చెందిన పార్లమెంటు సభ్యుడు సుఖాంత్ మజుందార్‌ను రాష్ర్ట బిజెపి అధ్యక్షుడిగా నియమించారు.

అధికార దుర్వినియోగం
కేంద్ర ప్రభుత్వానికి, రాష్ర్ట ప్రభుత్వానికి మధ్య తీవ్ర స్థాయిలో యుద్ధం జరుగుతున్నది. కేంద్రప్రభుత్వం తన ఏజన్సీల ద్వారా రాష్ర్టంలోని అధికారులను, అధికార పార్టీ నాయకులను భయపెడుతోందని రాష్ర్టంలో ఉన్న అధికార పార్టీ ఆరోపిస్తోంది. ఈ సమయంలో, కేంద్ర ప్రభుత్వం చేపట్టిన ఈ చర్యలు రానున్న రోజుల్లో చెప్పుకోదగ్గ రాజకీయ ప్రభావాన్ని కలగచేస్తాయని పరిశీలకులు భావిస్తున్నారు. రాష్ర్ట ప్రభుత్వ అనుమతి లేకుండా సిబిఐ కేసులు పెడుతోందని రాష్ర్ట ప్రభుత్వం సుప్రీంకోర్టు దృష్టికి ఈ మధ్యనే తీసుకెళ్ళింది. రాష్ర్ట పరిధిలో సిబిఐ చేపట్టే కేసులకు రాష్ర్ట ప్రభుత్వ అనుమతి తీసుకోవాలన్న నిబంధనను కేంద్రం ఉపసంహరించుకుందని కూడా తెలిపింది. “మా నాయకులను భయపెట్టడానికి కేంద్ర ప్రభుత్వం ఎన్‌ఫోర్స్ మెంట్ డైరెక్టరేట్‌ను, సిబిఐని ప్రయోగిస్తోంది. దీనికి తోడు ఇప్పుడు బిఎస్‌ఎఫ్ కూడా తోడైంది. క్షేత్ర స్థాయిలో పని చేస్తున్న మా నాయకులను మాదక ద్రవ్యాలు, దొంగనోట్ల చలామణి కేసుల్లో బిఎస్‌ఎఫ్ అరెస్టు చేయబోతున్న విషయాన్ని కూడా మీరు చూస్తారు” అని పేరు వెల్లడించడానికి ఇష్టపడని తృణమూల్ కాంగ్రెస్‌కు చెందిన ఒక ఎంపి ఆవేదన వ్యక్తం చేశారు. కేంద్ర ప్రభుత్వం తీసుకున్న ఈ నిర్ణయిన్ని పలువురు పౌర సమాజ సభ్యులు విభిన్న కోణాలలో తప్పుపట్టారు.

బిఎస్‌ఎఫ్ పరిధిని పెంచుతూ చట్ట సవరణ చేయడాన్ని వ్యతిరేకిస్తూ మానవ హక్కుల కార్యకర్త కిరీటీ రాయ్ జాతీయ మానవ హక్కుల కమిషన్‌కు లేఖ రాశారు. “రక్షణ పేరుతో రాజ్యాంగం కల్పించిన హక్కులను బిఎస్‌ఎఫ్ కాలరాస్తోంది. దీని వల్ల తప్పుడు కేసులు, చిత్ర హింసులు, చట్ట వ్యతిరేకంగా అరెస్టులు పెరగవచ్చు” అని ఆ లేఖలో ఆందోళన వ్యక్తం చేశారు. “గడచిన ఐదేళ్ళలో బిఎస్‌ఎఫ్ చట్టాన్ని అతిక్రమిస్తూ చిత్రహింసలుపెట్టి మొత్తం 240 కేసులు పెట్టింది. చట్టాన్ని అతిక్రమిస్తూ 60 మంది ప్రాణాలు తీసింది. ఎనిమిది మంది అదృశ్యమయ్యారు. ఈ కేసుల్లో 33 మంది మృతికి సంబంధించి వారి కుటుంబ సభ్యులకు పరిహారం చెల్లించాలని మానవ హక్కుల కమిషన్ (ఎన్‌హెచ్‌ఆర్‌సి) ఆదేశించింది” అని కిరీటి రాయ్ గుర్తు చేశారు. “కాల్పులలో మరణించిన అనేక సంఘటనల గురించి బిఎస్‌ఎఫ్ స్థానిక పోలీసులకు తెలపలేదు. స్మగ్లింగ్ కేసుల్లో పట్టుబడ్డ వారిని స్థానిక పోలీసులకు అప్పగించని సంఘటనలు అనేకం ఉన్నాయి. ఒక కేసులో వ్యక్తిని చిత్రహింసలతో చంపేసి, శవాన్ని నదిలోకో, సరిహద్దు ఆవలికో విసిరివేశారు. గాలింపు చర్యలు చేపట్టే అధికారం కనుక బిఎస్‌ఎఫ్‌కు అప్పగిస్తే, నిందితులను అరెస్టు చేసి, స్వాధీనం చేసుకుంటారు.

అరెస్టు చేసే పద్ధతిని, గాలింపును, అరెస్టు చేశాక నిందితుడిని అప్పగించడం వంటి చర్యల్లో క్రిమినల్ ప్రొసీజర్ కోడ్ నిర్దేశించిన పద్ధతులన్నిటినీ అతిక్రమిస్తున్నారు” అని కిరీటీ రాయ్ ఆరోపించారు. మౌసవ్‌ు అనే స్వచ్ఛంద సంస్థ అధిపతిగా బంగ్లాదేశ్ సరిహద్దుల్లో 1990 నుంచి కిరీటీ రాయ్ పని చేస్తున్నారు. కేంద్రం చేపట్టిన ఈ చర్యలను తాము కూడా నిరసిస్తామని ‘బంగ్లా సంస్కృతి మంచ్’ అనే సామాజిక సాంస్కృతిక సంస్థ అధ్యక్షుడు షమిరుల్ ఇస్లాం స్పష్టం చేశారు. బంగ్లా దేశ్ సరిహద్దు సమీపంలో నివసించే ప్రజలను ఇప్పటికే బిఎస్‌ఎఫ్ చిత్రహింసలకు గురిచేస్తోందని, కేంద్రం తీసుకున్న కొత్త నిర్ణయం వల్ల ప్రజలు ఇలాంటి మరిన్ని ఇబ్బందులను ఎదుర్కోవలసి వస్తుందని ఆయన హెచ్చరించారు.“స్మగ్లింగ్‌ను అరికట్టడంలో ఈ చర్యలు ఏమేరకు సత్ఫలితాలనిచ్చాయో తెలియదు. బిఎస్‌ఎఫ్‌ను ప్రస్తుతమున్న చట్ట పరిధిలోనే ఉంచడం మంచిది. 2024లో వచ్చే సాధారణ ఎన్నికలలో జరగనున్న మార్పును ప్రభావితం చేయడానికి చేపట్టిన ప్రయత్నం అనడంలో అతిశయోక్తి లేదు” అని ఇస్లాం వివరించారు. “రాష్ర్ట శాసన సభకు జరిగిన ఎన్నికల్లో విఫలమవడం వల్లనే దొడ్డి దారి ద్వారా రాష్ట్రాన్ని అదుపు చేయడానికి కేంద్రం చేస్తున్న ప్రయత్నమే ఇది. బెంగాల్, పంజాబ్‌లో గెలవడమే ఈ పథకం ప్రధాన ధ్యేయం.

దాని అసలు ఉద్దేశాన్ని కప్పిపుచ్చడానికి అస్సాం కేంద్ర ప్రతినిధిగా పని చేస్తోంది.” అని ఇస్లాం ఆరోపించారు. రాష్ర్ట పరిధిని కేంద్రం ఉల్లంఘించడంగా దీనిని భావించరాదని కోల్‌కతాలోని బంగాబసి కాలేజీ రాజనీతి శాస్త్ర అధ్యాపకుడు ఉదయన్ బందోపాధ్యాయ అన్నారు. “పోలీసుల స్థానంలో బిఎస్‌ఎఫ్‌కు బాధ్యతలు అప్పగించడం వల్ల రాష్ర్టం సైద్ధాంతికంగా ఏమీ కోల్పోదు. వారు పోలీసులకు తోడుగా పని చేస్తారు. జాతీయ భద్రత దృష్ట్యా నిర్ణయం తీసుకునే అధికారం కేంద్రానికి ఉంది. స్థానిక పాలనా వ్యవస్థను సంప్రదించకుండా కేంద్ర ఏజన్సీలు అరెస్టులు చేయడం చర్చించాల్సిన విషయమే. ఇప్పటికే ఎన్‌ఐఎ ఆ అధికారాన్ని చెలాయిస్తోంది” అని ఆయన వివరించారు. అవసరాల రీత్యా బిఎస్‌ఎఫ్ తన అధికారాన్ని ఉపయోగించుకుంటోదనే ఆరోపణ దాని పరిధిని విస్తరింపచేస్తోందని అన్నారు. బిఎస్‌ఎఫ్ పరిధిని పెంచడం వల్ల దాని సామర్థ్యం దెబ్బతింటుందని ఉత్తర బెంగాల్‌లోని విశ్వవిద్యాలయ విశ్రాంత అధ్యాపకులు ప్రొఫెసర్ జెత సాంకృత్యాయన్ వ్యాఖ్యానించారు. సాంకృత్యాయన్ గతంలో రాష్ర్ట ప్రణాళికా సంఘం సభ్యుడుగా కూడా పని చేశారు. “పోలీసులను తమ కర్తవ్యాలను తామే నిర్వర్తించేలా చేద్దాం. అక్రమ చొరబాట్లను అరికట్టడానికి, స్మగ్లింగ్‌ను నిరోధించడానికి సరిహద్దు భద్రతపై బిఎస్‌ఎఫ్‌ను దృష్టి సారించమందాం. అనవసరమైన గందరగోళం వల్ల పోలీసులతో ఘర్షణ తలెత్తుతుంది.” అని సాంకృత్యాయన్ హితవు పలికారు.

                                                                                                     – (‘ద వైర్’ సౌజన్యంతో)

Political row erupts in bengal over move to extend BSF