గ్యాంగ్ రేప్ బాధితురాలి పిల్లలకు ఉచిత విద్య అందించాలి

జార్ఖండ్ ప్రభుత్వానికి సుప్రీంకోర్టు ఆదేశం

న్యూఢిల్లీ : గ్యాంగ్ రేప్‌నకు గురైన ఓ మహిళ మైనర్ చిన్నారులకు ఉచిత విద్య అందించాల్సిందిగా జార్ఖండ్ ప్రభుత్వాన్ని సుప్రీంకోర్టు ఆదేశించింది. 2002, జూన్ 8న ఓ గిరిజన మహిళపై జార్ఖండ్‌లోని డాల్టన్‌గంజ్‌లో నలుగురు దుండగులు అత్యాచారానికి పాల్పడ్డారు. ఆ సంఘటనకు ముందు ఆమె తన భర్తతో పలు ఇబ్బందులనెదుర్కొని విడాకులకు దరఖాస్తు చేసుకున్నారు. దాంతో, ఆమె మానసికంగా కృంగుబాటుకు గురయ్యారు. ఈ నేపథ్యంలోనే సుప్రీంకోర్టు ఆమె రక్షణ పట్ల ప్రత్యేక శ్రద్ధ తీసుకోవాలని అధికారులను ఆదేశించింది. ఆమెకు ఇప్పటికే పరిహారం అందించారు. తాజాగా బుధవారం ఇచ్చిన ఆదేశాలమేరకు ఆమెకు కేంద్ర లేదా రాష్ట్ర ప్రభుత్వ పథకాల్లో ఓ పక్కా ఇల్లు నిర్మించి ఇవ్వాలి. ఆమె పిల్లలు 14 ఏళ్ల వయసు వచ్చే వరకు ఉచిత విద్య అందించాలి. బాధిత మహిళ సామాజిక వివక్షను కూడా ఎదుర్కొన్నారని జస్టిస్ అశోక్‌భూషణ్, ఆర్.సుభాష్‌రెడ్డి, ఎంఆర్ షాలతో కూడిన సుప్రీంకోర్టు త్రిసభ్య ధర్మాసనం వ్యాఖ్యానించింది.