హైదరాబాద్ : మనం ఎప్పుడో ఒకసారైనా ట్రైన్ బయలుదేరేటప్పుడు పరిగెత్తుకుంటూ వెళ్లి రైలు ఎక్కే ఉంటాం. ఇలాంటి సమయంలో ట్రైన్ టికెట్ కూడా తీసుకోకపోవచ్చు. తర్వాతి స్టేషన్‌లో తీసుకోవచ్చని ట్రైన్ ఎక్కుతూ ఉంటారు. అయితే కొన్ని సార్లు మనం ట్రైన్‌లోనే కొంత చార్జీ చెల్లించి టికెట్ తీసుకుంటూ ఉంటాం. స్లీపర్ లేదా ఏసీ క్లాస్ సీట్లు ఖాళీగా ఉంటే.. ఇలా డబ్బులు ఇచ్చేసి టికెట్ తీసుకోవచ్చు. టికెట్ పొందిన తర్వాత ఇబ్బంది లేకుండా గమ్య స్థానానికి వెళ్లొచ్చు. అయితే ఇలా ట్రైన్‌లో టికెట్ తీసుకునేటప్పుడు చేతిలో డబ్బులు లేకపోతే కొంత ఇబ్బంది పడాల్సి రావొచ్చు. అయితే ప్రయాణికులకు ఈ సేవలు మరింత మెరుగ్గా అందించేందుకు ఇండియన్ రైల్వేస్ తన ఎక్విప్‌మెంట్‌ను అప్‌గ్రేడ్ చేసింది. దీని వల్ల ప్రయాణికులకు నగదు రూపంలో కాకుండా కార్డు ద్వారా కూడా సులభంగా చెల్లింపులు చేసి టికెట్ తీసుకోవచ్చు.
కొత్త సదుపాయం
ఇండియన్ రైల్వేస్ పీఓఎస్ మెషీన్లలో 4జీ సిమ్ కార్డులను అమర్చుతోంది. ప్రస్తుతం ఈ మెషీన్లలో 2జీ సిమ్ కార్డులు ఉన్నాయి. రైల్వేస్ ప్రకారం.. దేశవ్యాప్తంగా 36 వేల మెషీన్లలో 4జీ సిమ్ కార్డులను అమర్చారు. ఈ సిమ్ కార్డుల వల్ల రైల్వే ప్రయాణికులు జరిమానా లేదా అదనపు చార్జీ మొత్తాన్ని కార్డు ద్వారా సులభంగా చెల్లించొచ్చు. ట్రైన్‌లో టీటీ దగ్గర ఈ మెషీన్లు ఉంటాయి. టికెట్ లేకుండా ట్రైన్ ఎక్కితే.. వీరి వద్దకు వెళ్లి టికెట్ తీసుకోవచ్చు. లేదంటే టికెట్‌ను హైయర్ క్లాస్‌కు అప్‌గ్రేడ్ చేసుకోవచ్చు. దీని వల్ల ప్రయాణికులకు మెరుగైన సేవలు లభిస్తాయి. అంతేకాకుండా సర్వీసులు వేగంగా లభిస్తాయి. క్యాష్ ట్రాన్సాక్షన్ల బెడద ఉండదు.
అప్‌గ్రేడ్ ఎందుకు?
ఇదివరకు పీఓఎస్ మెషీన్లలో 2జీ సిస్టమ్ ఇన్‌స్టాల్ చేయడం వల్ల చాలా చోట్ల పేమెంట్లు చాలా ఆలస్యం అయ్యేవి. అలాగే కొన్ని సార్లు ట్రాన్సాక్షన్లు జరిగేవి కూడా కాదు. ఇలాంటి సందర్భాల్లో ప్రయాణికుల వద్ద నగదు లేకపోతే ఇబ్బందులు పడాల్సి వచ్చేది. నెట్‌వర్క్ సిగ్నల్స్ బలహీనంగా ఉండటం వల్ల కార్డు ద్వారా చెల్లింపులు కష్టమయ్యేవి. ఇకపై ఇలాంటి సమస్యలు ఉండవు. రాజధాని, శతాబ్ది ట్రైన్స్‌లో ఈ కొత్త పీఓఎస్ మెషీన్లు అందుబాటులోకి వచ్చినట్లు తెలుస్తోంది. రానున్న రోజుల్లో ఇతర ట్రైన్స్‌లో కూడా ఈ సేవలు లభించనున్నాయి.