శ్రీశైలం 10 గేట్లు ఎత్తివేత

శ్రీశైలం ప్రాజెక్టుకు భారీ వరద కొనసాగుతుంది. మంగళవారం 4 లక్షల క్యూసెక్కుల ఇన్ ఫ్లో నమోదయింది. ఎగువ మహారాష్ట్ర, కర్ణాటకలతో పాటు తెలుగు రాష్ట్రాలలో ఎడతెరిపి లేకుండా వర్షాలు కురుస్తుండడంతో కృష్ణ బేసిన్ కు వరద పోటెత్తింది. శ్రీశైలం జలాశయానికి 4 లక్షల క్యూసెక్కుల ఇన్ ఫ్లో వస్తుండడంతో శ్రీశైలం ప్రాజెక్ట్ అధికారులు సోమవారం 10 గేట్లను 14అడుగుల మేర ఎత్తి 4 లక్షల 9 వేల క్యూసెక్కులను దిగువ నాగార్జునసాగర్ వైపుకు వదులుతున్నారు. శ్రీశైలం లెఫ్ట్ రైట్ బ్యాంక్ విద్యుత్ కేంద్రాల ద్వారా ఉత్పత్తి నిరంటంకంగా కొనసాగుతుంది. కర్ణాటకలోని అలమట్టి నారాయణపూర్ ప్రాజెక్టులతో పాటు తెలంగాణలోని జూరాల, శ్రీశైలం జలాశయాలు నిండుకుండగా మారాయి. దీంతో పాటు తుంగభద్ర నదికి భారీగా వరద ప్రవాహం వస్తుండడంతో సుంకేసుల బ్యారేజ్ కి లక్ష 32వేల క్యూసెక్కుల ఇన్ ఫ్లో వస్తుండడంతో అధికారులు 20 గేట్లను ఎత్తి శ్రీశైలం వైపుకు లక్ష 25వేల క్యూసెక్కులను వదులుతున్నారు. హంద్రీ నది నుంచి 2వేల క్యూసెక్కుల ఇన్ ఫ్లో కొనసాగుతోంది.