సూపర్ స్టార్ మహేష్ బాబు, నమ్రతా శిరోద్కర్ జిఎంబి ఎంటర్‌టైన్‌మెంట్, కేరాఫ్ కంచరపాలెం, ఉమా మహేశ్వర ఉగ్ర రూపస్య చిత్రాలతో పేరు తెచ్చుకున్న డైరెక్టర్ వెంకటేష్ మహా తాజా చిత్రం ’రావు బహదూర్’ను గర్వంగా సమర్పిస్తున్నారు. వర్సటైల్ యాక్టర్ సత్య దేవ్ హీరోగా నటిస్తున్న ఈ చిత్రాన్ని ఏ ప్లస్ ఎస్ మూవీస్, శ్రీచక్రాస్ ఎంటర్‌టైన్‌మెంట్స్ నిర్మిస్తున్నాయి. రావు బహదూర్ కథ నచ్చి మహేష్ బాబు, నమ్రత ప్రొడక్షన్‌లోకి వచ్చారు. మంచి కంటెంట్ ఉన్న కథలకు వీరి మద్దతు ఎప్పుడూ వుంటుంది. రావు బహదూర్ ఓ సైకలాజికల్ డ్రామా. ఓ రాజవంశం నేపథ్యంలో ఈ కథ నడుస్తుంది. ఈ చిత్రానికి రచన, దర్శకత్వం, ఎడిటింగ్ వెంకటేష్ మహా. గొప్ప విజువల్స్, భావోద్వేగాలు, చరిత్రా-సంస్కృతి కలిపిన ప్రపంచాన్ని చూపించబోతున్నారు.
మంగళవారం రిలీజ్ చేసిన ఫస్ట్ లుక్ పోస్టర్‌లో సత్యదేవ్‌ను అరిస్టోక్రాటిక్ డ్రెస్‌లో, చుట్టూ నెమలి పించాలు, తీగలు, చిన్న చిన్న బొమ్మల మధ్య కనిపించడం చాలా ఆసక్తిని కలిగించింది. ఆగస్టు 15న థియేటర్స్‌లో ‘నాట్ ఈవెన్ ఎ టీజర్‘ అనే స్పెషల్ వీడియో రిలీజ్ అవుతుంది. ఆ తర్వాత ఆగస్టు 18న డిజిటల్‌లో వస్తుంది. ఈ సందర్భంగా దర్శకుడు వెంకటేష్ మహా మాట్లాడుతూ ఇది ప్రపంచానికి వినిపించాల్సిన తెలుగు కథ అని అన్నారు. సత్యదేవ్ మాట్లాడుతూ “ఒక యాక్టర్‌గా, రావు బహదూర్ లాంటి సినిమా దొరకడం అరుదు. ఈ సినిమాలో నేను కేవలం నటించలేదు, నిజంగానే రావు బహదూర్‌గా బతికాను”అని తెలిపారు. ఈ చిత్రాన్ని 2026 వేసవిలో తెలుగు, మల్టిపుల్ లాంగ్వేజెస్ సబ్‌టైటిల్స్‌తో గ్లోబల్ రిలీజ్ ప్లాన్ చేస్తున్నారు.