వరల్డ్ చాంపియన్‌ చికిత తానిపర్తిని అభినందించిన సిఎం రేవంత్

కెనడాలో జరుగుతున్న ప్రపంచ యూత్ చాంపియన్ షిప్‌లో స్వర్ణ పతకం సాధించి వరల్డ్ చాంపియన్‌గా నిలిచిన పెద్దపల్లి జిల్లా ఎలిగేడు మండలం సుల్తాన్‌పూర్ గ్రామానికి చెందిన చికిత తానిపర్తికి ముఖ్యమంత్రి రేవంత్ రెడ్డి అభినందనలు తెలియజేశారు. ఆర్చరీ అండర్ 21 కేటగిరీ ఫైనల్లో కొరియాకు చెందిన పార్క్ యెరిన్‌పై విజయం సాధించి స్వర్ణం చేజిక్కించుకొని చికిత వరల్డ్ చాంపియన్‌గా నిలవడం దేశానికే గర్వకారణమని సిఎం తెలిపారు. ఆత్మవిశ్వాసం, ఏకాగ్రత, లక్ష్యాన్ని సాధించాలన్న చికిత తానిపర్తి సంకల్పం యువతీ, యువకులకు స్ఫూర్తిదాయకమని ముఖ్యమంత్రి పేర్కొన్నారు. ఆటుపోట్లను తట్టుకుంటూ గ్రామీణ ప్రాంతం నుంచి ఒక్కో మెట్టు ఎక్కుతూ ఆర్చరీలో రాణించిన చికిత తానిపర్తి భవిష్యత్‌లో మరిన్ని విజయాలు సాధించాలని సిఎం ఆకాంక్షించారు. చిన్ననాటి నుంచి చికిత తానిపర్తిలోని ప్రతిభను గుర్తించి అందుకు అనుగుణంగా ప్రోత్సహించిన తల్లిదండ్రులకు సిఎం అభినందనలు తెలియజేశారు.