హీరో నారా రోహిత్ తాజా బ్లాక్‌బస్టర్ ‘సుందరకాండ’. వెంకటేష్ నిమ్మలపూడి దర్శకత్వంలో సందీప్ పిక్చర్ ప్యాలెస్ బ్యానర్‌పై సంతోష్ చిన్నపొల్ల, గౌతమ్ రెడ్డి, రాకేష్ మహంకాళి ఈ చిత్రాన్ని నిర్మించారు. వృతి వాఘాని, శ్రీదేవి విజయ్ కుమార్ హీరోయిన్లుగా నటించిన ఈ చిత్రం బుధవారం ప్రపంచవ్యాప్తంగా విడుదలై అద్భుతమైన విజయం సాధించి, సక్సెస్‌ఫుల్‌గా రన్ అవుతోంది. ఈ సందర్భంగా మేకర్స్ హైదరాబాద్‌లో థాంక్ యూ మీట్ నిర్వహించారు. ఈ వేడుకలో హీరో నారా రోహిత్ మాట్లాడుతూ “థియేటర్స్‌కు వచ్చి సినిమాను ఎంజాయ్ చేస్తున్న ప్రేక్షకులకు ధన్యవాదాలు. ఇంకా చూడని వాళ్ళు తప్పకుండా ఈ సినిమా చూడండి. టికెట్స్ అన్నీ కూడా అందుబాటులో రేట్స్‌లో ఉంచాము. ఫ్యామిలీతో ఈ వీకెండ్‌కు ‘సుందరకాండ’కు వెళ్లి హ్యాపీగా చూడండి. ఫ్రెండ్స్, ఫ్యామిలీతో ఎంజాయ్ చేసే మంచి చిత్రమిది”అ ని అన్నారు.
డైరెక్టర్ వెంకటేష్ నిమ్మలపూడి మాట్లాడుతూ “సినిమా చూసి అందరూ నవ్వుకుంటున్నారని తెలిసి చాలా ఆనందంగా అనిపించింది. నవ్వించడం అంత సులభం కాదు. నా రైటింగ్‌కి మంచి ప్రశంసలు రావడం చాలా ఆనందాన్నిచ్చింది. హీరో రోహిత్ అన్న, నిర్మాత సంతోష్ అన్న.. వాళ్ళిద్దరూ నమ్మకపోతే ఈ సినిమా వచ్చేది కాదు. ఎక్కడ రాజీ పడకుండా ఈ సినిమాని నిర్మించారు”అని తెలిపారు. నిర్మాత సంతోష్ మాట్లాడుతూ “సినిమా చూసిన ప్రతి ఒక్కరు సినిమా గురించి అద్భుతంగా చెబుతున్నారు. దిల్ రాజు ప్రొడక్షన్ నుంచి వచ్చినట్టు చాలా మంచి ఫ్యామిలీ ఎంటర్‌టైనర్ తీశారని చెబుతుంటే గొప్ప ఆనందం కలిగింది”అని పేర్కొన్నారు. ఈ కార్యక్రమంలో హీరోయిన్ విర్తి వాఘాని, నిర్మాత రాకేష్, వాసుకీ తదితరులు పాల్గొన్నారు.