ఢిల్లీకి వెళ్లిన సిఎం రేవంత్‌ రెడ్డి

ముఖ్యమంత్రి రేవంత్ రెడ్డి మరోసారి హస్తినకు బయలుదేరి వెళ్లారు. శుక్రవారం రాత్రి ఆయన ప్రత్యేక విమానంలో ఢిల్లీకి వెళ్లారు. నేడు ఢిల్లీలోని విజ్ఞాన్ భవన్‌లో ఆలిండియా కాంగ్రెస్ కమిటీ (ఏఐసిసి) లా, హ్యూమన్ రైట్స్ అండ్, ఆర్‌టిఐ విభాగం-2025 ఆధ్వర్యంలో నిర్వహించబోతున్న న్యాయ విభాగం కాంక్లేవ్‌లో పాల్గొనబోతున్నారు. ‘రాజ్యాంగ సవాళ్లు- దృక్పథం, మార్గాలు’ అనే థీమ్‌తో ఈ సదస్సు కొనసాగనుంది. భారత రాజ్యాంగంలో నీతి, పరిణామ పాత్రపై న్యాయ నిపుణులు, విద్వాంసులు, విద్యార్థులు ఈ చర్చలో భాగస్వాములు కానున్నారు. ఈ కార్యక్రమానికి ఏఐసిసి అధ్యక్షులు మల్లికార్జున ఖర్గే, లోక్‌సభా పక్ష నేత రాహుల్ గాంధీ ప్రియాంక గాంధీ, ఆయా రాష్ట్రాల కాంగ్రెస్ ముఖ్యమంత్రులు పాల్గొనున్నారు. సుమారు 1,200 మంది న్యాయ నిపుణులు, కాంగ్రెస్ నాయకులు, కార్యకర్తలు హాజరవుతున్న ఈ కాంక్లేవ్‌కు నిర్వాహకులు ఇప్పటికే అన్ని ఏర్పాట్లు చేశారు. తెలంగాణ నుంచి రాజ్యసభలో ప్రాతినిథ్యం వహిస్తున్న అభిషేక్ మనుసింఘ్వీ ఆధ్వర్యంలో ఈ సదస్సు జరుగనుంది.