హైదరాబాద్: జోగులాంబ గద్వాల్ జిల్లాలో జూరాల ప్రాజెక్టులో మూడు రోజుల క్రితం గల్లంతైన మహేష్ మృతదేహం కనిపించింది. కృష్ణ నది పరివాహక ప్రాంతమైన మూలమల్ల శివారులో మహేష్ మృతదేహాన్ని మత్స్యకారులు గుర్తించి పోలీసులకు సమాచారం ఇచ్చారు. పోలీసులు ఘటనా స్థలానికి చేరుకొని మృతదేహాన్ని స్వాధీనం చేసుకున్నారు. పోలీసులు మృతుడి కుటుంబ సభ్యులకు సమాచారం ఇచ్చారు.
గద్వాల జిల్లా మానవపాడు మండలం బూడిదపాడు(ఎ) గ్రామానికి చెందిన జానకి రాము, మహేష్ ఆదివారం సెలవుదినం కావడంతో జూరాల ప్రాజెక్టు సందర్శనకు వచ్చారు. సందర్శన అనంతరం బైక్‌పై గద్వాలకు తిరిగి వస్తున్నారు. అదే సమయంలో అమరచింత వైపు వెళ్తున్న కారు డ్రైవర్ వాహనాన్ని నిర్లక్ష్యంతో నడపడంతో జూరాల ప్రాజెక్టు 48 గేట్ వద్ద వారి బైక్‌ను ఢీకొట్టింది. బైక్ నడుపుతున్న జానకి రాములుకు తీవ్ర గాయాలయ్యాయి. అతని వెనుక కూర్చున్న మహేష్ ఎగిరి కృష్ణానదిలో పడి గల్లంతయ్యాడు. ఈ విషయాన్ని తెలుసుకున్న పోలీసులు సంఘటన స్థలానికి చేరుకొని గాలింపు చర్యలు చేపట్టారు.
ఆదివారం రాత్రి కావడంతో గాలింపు చర్యలు నిలిపివేసి, సోమవారం ఉదయం జాలర్ల సాయంతో నదిలోకి దిగి గాలింపు చర్యలు చేపట్టారు. అయినా మహేష్ ఆచూకీ లభించలేదు. జూరాల ప్రాజెక్టు 48 గేట్ ముందు వరద ప్రవాహం లేకున్న లోతుగా ఉండడంతో మృతదేహం కనిపించలేదు. కృష్ణ నది పరివాహక ప్రాంతమైన మూలమల్ల శివారులో మహేష్ మృతదేహాన్ని మత్స్యకారులు గుర్తించి పోలీసులకు సమాచారం ఇచ్చారు. పోలీసులు ఘటనా స్థలానికి చేరుకొని మృతదేహాన్ని స్వాధీనం చేసుకున్నారు. పోలీసులు మృతుడి కుటుంబ సభ్యులకు సమాచారం ఇచ్చారు. మృతుడి కుటుంబ సభ్యుల ఫిర్యాదు మేరకు కేసు నమోదు చేసుకొని కారు డ్రైవర్ ను అరెస్టు చేసి రిమాండ్ కు తరలించారు.