ఉస్మానియా యూనివర్సిటీకి ముఖ్యమంత్రి వెళ్తున్న సందర్భంగా విద్యార్థులను ముందస్తు అరెస్టులు చేయడం అప్రజాస్వామిక, పిరికిపంద చర్య అని మాజీ మంత్రి, బిఆర్‌ఎస్ ఎంఎల్‌ఎ హరీష్‌రావు మండిపడ్డారు. వెంటనే వారిని విడుదల చేయాలని ఒక ప్రకటనలో డిమాండ్ చేశారు. ఒక్క విద్యార్థి మీద పోలీసు లాఠీ పడినా తెలంగాణ సమాజం చూస్తూ ఊరుకోదని హెచ్చరించారు. ఇందుకేనా విద్యాశాఖను, హోం శాఖను రేవంత్‌రెడ్డి తన వద్ద పెట్టుకున్నది అని నిలదీశారు. ఒక్క విద్యార్థులే కాదు, యావత్ తెలంగాణ రేవంత్‌రెడ్డి ఇచ్చిన మోసపూరిత హామీల గురించి నిలదీస్తున్నదని, మొత్తం తెలంగాణ సమాజం మీద నిషేధాజ్ఞలు విధిస్తారా..? అని ప్రశ్నించారు. ఏడో గ్యారంటీగా ప్రజాస్వామ్య పాలన అని చెప్పి, రేవంత్‌రెడ్డి ఎమర్జెన్సీ రోజులను తిరిగి తెచ్చారని మండిపడ్డారు. కెసిఆర్ ఇచ్చిన ఉద్యోగాలకు నియామక పత్రాలు ఇవ్వడం..కెసిఆర్ హయాంలో ఒయులో శంకుస్థాపన చేసిన నిర్మాణాలను ప్రారంభించడం తప్ప 22 నెలలుగా ఆయన చేసింది ఏముంది..? అని అడిగారు.
జాబ్ క్యాలెండర్ జాబ్ లెస్ క్యాలెండర్ చేశారు.. మొదటి ఏడాదిలోనే రెండు లక్షల ఉద్యోగాలని మోసం చేశారు..నిరుద్యోగ భృతి పేరిట నయవంచన చేశారని అన్నారు. 22 నెలల్లో 10 వేల ఉద్యోగాలు కూడా ఇవ్వకుండా 60 వేల ఉద్యోగాలు ఇచ్చినట్లు తప్పుడు ప్రచారం చేస్తున్నారని ఆగ్రహం వ్యక్తం చేశారు. సిఎం తప్పుడు ప్రచారంపై కడుపు మండిన విద్యార్థులు, నిరుద్యోగులు ప్రశ్నిస్తే అక్రమ కేసులు పెడుతున్నారని అన్నారు. నెలల తరబడి విద్యార్థులు, నిరుద్యోగులు నోటిఫికేషన్ల కోసం ఎదురు చూస్తుంటే రేవంత్‌రెడ్డి ఢిల్లీకి చక్కర్లు కొడుతూ కాలం వెళ్లదీస్తున్నారని విమర్శించారు. గ్రంథాలయాల్లో పోలీసు లాఠీ చార్జీలు జరిపించిన అరాచక చరిత్ర కాంగ్రెస్ ప్రభుత్వానిది, విద్యార్థులు, నిరుద్యోగుల వీపులు పగుల గొట్టిన అమానుష పాలన కాంగ్రెస్ ప్రభుత్వానిది అని మండిపడ్డారు. ఆంక్షలతో, నిషేధాలతో నిరుద్యోగుల హృదయాల్లో రగులుతున్న నిరసన జ్వాలలను చల్లార్చలేరని పేర్కొన్నారు.
ఇనుప కంచెలు, బ్యారికెడ్లతో ప్రజా తిరుగుబాటును ఆపలేరు..పోలీసు బలం, బలగంతో విద్యార్థుల నిరసన జ్వాలలను చల్లార్చలేరు అని చెప్పారు. ఉస్మానియా విద్యార్థి, నిరుద్యోగులు సింహాలై గర్జిస్తారని, ఉద్యోగాల పేరిట రేవంత్‌రెడ్డి చేసిన మోసాన్ని ఎక్కడిక్కడ నిలదీస్తారని హెచ్చరించారు. మోసం చేసినందుకు ఉస్మానియా సాక్షిగా విద్యార్థులకు క్షమాపణలు చెప్పాలని, ఎన్నికల మేనిఫెస్టోలో ఇచ్చిన హామీలు వెంటనే అమలు చేయాలని ముఖ్యమంత్రి రేవంత్ రెడ్డిని బిఆర్‌ఎస్ పక్షాన హరీష్‌రావు డిమాండ్ చేశారు.