ఈ నెల 10న ప్రారంభం
31 రాత్రి పది నుంచి ఒంటి గంట మధ్య ఫైనల్
మిస్ వరల్డ్ విజేత ప్రకటనతో వేడుక ముగింపు
మన తెలంగాణ/హైదరాబాద్: ప్రతిష్టాత్మక మిస్ వరల్డ్ 2025 పోటీలకు తెలంగాణ ముస్తాబయ్యింది. 116 దేశాల నుంచి అందాల తారలు ఈ కార్యక్రమంలో పాల్గొననున్నారు. అమెరికా, కరీబియన్, ఆఫ్రికా, యూరప్, ఆసియా తదితర దేశాల నుంచి వచ్చే ఈ పోటీదారులు తెలంగాణ ఆతిథ్యాన్ని స్వీకరించనున్నారు. ఈ వేడుకలు తెలంగాణ సంస్కృతి, వారసత్వం, సంప్రదాయాల ఘన కీర్తిని ప్రపంచానికి చాటి చెప్పనున్నాయి. ఈ నెల 10న ప్రారంభమైన ఈ భారీ ఈవెంట్ ఈ నెల 31 సాయంత్రం 5.30 గంటలకు రెడ్ కార్పెట్ ఈవెంట్ నిర్వహణ అనంతరం రాత్రి 10 నుంచి ఒంటి గంట వరకు ఫైనల్ జరుగుతుంది. అనంతరం మిస్ వరల్డ్ విజేతను ప్రకటిస్తారు. దీంతో మిస్ వరల్డ్ 2025 ప్రక్రియ ముగుస్తుంది.
రోజు వారీ కార్యక్రమాల వివరాలు
మెగా ఈవెంట్ 72వ మిస్ వరల్డ్ 2025 పోటీలు మే 10 సాయంత్రం 5 గంటలకు గచ్చిబౌలి ఇండోర్ స్టేడియంలో ప్రారంభమవుతాయి. బౌద్ధ ఆధ్యాత్మిక యాత్రలో భాగంగా మే 12న నాగార్జునసాగర్, బుద్ధవనాన్ని ఆసియాకు చెందిన 28 మంది మిస్ వరల్ 2025 టీమ్ బౌద్ధ థీమ్ పార్క్ సందర్శిస్తారు. హైదరాబాద్ హెరిటేజ్ వాక్‌లో భాగంగా మే 13న చార్మినార్, లాడ్ బజార్ ప్రాంతంలో హైదరాబాద్ చారిత్రక వారసత్వ కట్టడాలను సందర్శిస్తారు. మే 13 సాయంత్రం 6 గంటలకు చౌమహల్లా ప్యాలెస్‌లో వెల్ కమ్ డిన్నర్ ఉంటుంది. అత్యద్భుతమైన ప్యాలెస్ సందర్శనతో పాటు మ్యూజికల్ కన్సర్ట్‌తో విందును స్వీకరిస్తారు. మే 14, సాయంత్రం 5 గంటలకు వరంగల్ హెరిటేజ్ టూర్‌లో భాగంగా వేయి స్తంభాల గుడి, వరంగల్ కోటను అమెరికాకు చెందిన 22 మంది పోటీదారులు ఈ యాత్రలో పాల్గొంటారు.
మే 14 సాయంత్రం 4.30కి యునెస్కో వారసత్వ కట్టడం రామప్ప ఆలయాన్ని సందర్శిస్తారు. యూరప్ దేశాలకు చెందిన 35 మంది పోటీదారులు ఈ యాత్రలో పాల్గొంటారు. వీరికి కనువిందు చేసే విధంగా పేరిణి నృత్య ప్రదర్శన ఏర్పాటు చేశారు. కాగా మే 15 సాయంత్రం 5 గంటలకు యాదగిరిగుట్ట ఆధ్యాత్మిక టెంపుల్ టూర్‌లో కరీబియన్ దేశాలకు చెందిన 10 మంది ఈ ఆధ్యాత్మిక యాత్రలో పాల్గొంటారు. పోచంపల్లి హ్యాండ్లూమ్ ఎక్స్పీరెన్సియల్ టూర్‌ను మే 15 సాయంత్రం 6 గంటలకు నిర్వహిస్తారు. ఈ టూర్‌లో ఆఫ్రికా దేశాలకు చెందిన 25 మంది తెలంగాణ చేనేత వస్త్ర పరిశ్రమను సందర్శిస్తారు. ఇక మెడికల్ టూరిజంలో భాగంగా మే 16న తెలంగాణలో అభివృద్ధి చెందుతున్న మెడికల్ టూరిజంను సందర్శిస్తారు. ఈ 16వ తేదీన అమెరికా గ్రూప్నకు చెందిన పోటీదారులు మహబూబ్‌నగర్ పిల్లలమర్రి చెట్టును సందర్శిస్తారు.
ఎకో టూర్ పార్క్ సందర్శనలో భాగంగా ఈ నెల 16న ఆసియాకు చెందిన 24 మంది పోటీదారులు ఎక్స్పీరియం ఎకో టూరిజం పార్క్‌ను సందర్శిస్తారు. అలాగే ఈ నెల 17న గచ్చిబౌలి స్టేడియంలో జరిగే స్పోర్ట్ ఫినాలేలో పోటీదారులు పాలుపంచుకుంటారని వెల్లడించారు. రామోజీ ఫిల్మ్ సిటీ టూర్‌ను మే 17న నిర్వహిస్తారు. పపంచంలోనే అతిపెద్ద ఫిల్మ్ స్టూడియోను సందర్శిస్తారు. సేఫ్టీ టూరిజంలో భాగంగా మే 18న ఇంటిగ్రేటేడ్ కమాండ్ కంట్రోల్ సెంటర్‌లో పోటీదారులు టీజీఐసీసీసీని సందర్శిస్తారు. ఈ నెల 18 సాయంత్రం సెక్రటేరియట్ బీఆర్ అంబేద్కర్ సెక్రటేరియట్‌ను సందర్శించి తెలంగాణ రైజింగ్ విజన్‌ను తెలుసుకుంటారు. ట్యాంక్‌బండ్, తెలంగాణ తల్లి, నెక్లెస్ రోడ్డులో సండే ఫన్ డే కార్నివాల్ నిర్వహిస్తారు. మే 20, మే 21న కాంటినెంటల్ ఫైనల్ నిర్వహిస్తారు. దీనిలో ఖండాల వారీగా పోటీదారుల ఫాస్ట్-ట్రాక్ సెలెక్షన్స్‌లో పాల్గొంటారు. ఐపిఎల్ సెమీఫైనల్స్ మే 20, లేదా 21న ఉప్పల్ ఆర్జీఐ స్టేడియంలో తిలకిస్తారు.
క్రికెట్ ఆడే దేశాలకు చెందిన 20 మంది పోటీదారులు ఉప్పల్ స్టేడియంలో సందడి చేస్తారు. 21వ తేదీ సాయంత్రం శిల్పారామంలో జరిగే ఆర్ట్ అండ్ క్రాఫ్ట్‌లో యూరప్‌కు చెందిన 35 మంది శిల్పారామంలో తెలంగాణ డ్వాక్రా బజార్ స్టాళ్లను సందర్శిస్తారు. 22వ తేదీన శిల్పకళా వేదికలో మిస్ వరల్డ్ టాలెంట్ ఫైనల్‌లో 116 మంది పోటీదారులు పాల్గొని వివిధ కళల్లో తమ ప్రతిభను ప్రదర్శిస్తారు. ట్రైడెంట్ హోటల్‌లో మే 23న హెడ్- టు- హెడ్ ఛాలెంజ్‌లో భాగంగా మిస్ వరల్ట్ ఛాలెంజ్‌లో అందాల తారలు పాల్గొంటారు. మే 24 సాయంత్రం ట్రైడెంట్/హైటెక్స్‌లో జరిగే మిస్ వరల్డ్ టాప్ మోడల్, ఫ్యాషన్ ఫైనల్‌లో సుందరీమణులందరూ ఫ్యాషన్, జ్యువెలరీ షోలో పాల్గొంటారు. అనంతరం మే 24న హైటెక్స్‌లో బ్యూటీ విత్ పర్పస్ డిన్నర్‌లో అందాల తారలంతా విందులో పాల్గొంటారు. కాగా మే 31 సాయంత్రం 5.30 గంటలకు రెడ్ కార్పెట్ ఈవెంట్ ప్రారంభమవుతుంది. రాత్రి 10 నుంచి ఒంటి గంట వరకు ఫైనల్ జరుగుతుంది. అనంతరం మిస్ వరల్డ్ విజేతను ప్రకటిస్తారు. రాష్ట్ర ఆవిర్భావ దినోత్సవం సందర్భంగా జూన్ 2న రాజ్‌భవన్‌లో కొత్త మిస్ వరల్డ్, 6 ఖండాల విజేతలు, జూలియా మోర్లీతో సహా 8 మంది రాష్ట్ర గవర్నర్, ముఖ్యమంత్రితో హై-టీలో పాల్గొంటారు.