ఆధ్యాత్మికత, వ్యాపారం తరచూ కలిసిపోయే భారతదేశంలో రామ్‌దేవ్ బాబా అనే యోగ గురువు ఈ సమ్మేళనాన్ని అసాధారణంగా కలిపి, నడిపిన వ్యక్తి. పతంజలి బ్రాండ్ ద్వారా ఆయుర్వేద ఉత్పత్తులను హిందూ జాతీయవాదంతో ముడిపెట్టి, కోట్లాది మంది హృదయాలను ఆకర్షించిన వ్యక్తి. ఆయన, ఆధ్యాత్మిక బోధకుడి నుండి వివాదాస్పద వ్యాపారవేత్తగా మారిన ప్రస్థానం విమర్శలకు తావిచ్చింది. ఈ దేశంలో మెజారిటీ ప్రజలను మోసగించాలంటే కాషాయానికి మించిన వేషధారణ మరొకటి లేదు. అందుకే ఈ వ్యాపారవేత్త కాషాయం కట్టి, యోగా బాబా అవతారం ఎత్తి, ఇప్పుడు ఆయుర్వేదం ముసుగులో నాసిరకం ఔషధాలు తయారు చేసి అంతర్జాతీయ వ్యాపారవేత్తగా అవతారం ఎత్తాడు. అనేకసార్లు నకిలీ వస్తువుల జాబితాలలో సంబంధిత సంస్థలు రైడ్స్ చేసి పంతంజలి కల్తీ బాగోతాన్ని శాస్త్రీయంగా ప్రకటించారు.
అయినా కేంద్ర ప్రభుత్వంలోని బిజెపి, ఆర్‌ఎస్‌ఎస్ రాజకీయ పలుకుబడితో నెట్టుకొస్తున్నారు. తాజాగా, హందర్ద్ లాబొరేటరీస్‌కు చెందిన ‘రూహ్ ఆఫ్జా’ దక్షిణాసియా ముస్లిం సమాజాలతో ముడిపడిన ఒక పానీయంపై షర్బత్ జిహాద్ అనే వ్యాఖ్యలతో ఆయన మరోసారి వివాదంలో చిక్కుకున్నారు. ఈ ఘటన, కొవిడ్- 19 సమయంలో నిరూపితం కాని ఔషధాలను ప్రచారం చేసిన ఆయన చరిత్రతో కలిసి, నీతిహీన వ్యాపార వ్యూహాలను బహిర్గతం చేస్తుంది. ఆ నాసీరకం ఔషధం కొవిడ్‌ను తగ్గిస్తుంది అని నిరూపితం కాని వ్యాపార ప్రకటనలు కేంద్ర వైద్యశాఖా మంత్రి సమక్షంలో, మరో కేంద్ర మంత్రి నితిన్ గడ్కరీ సమక్షంలో ప్రకటించారు. లక్షలాది కొవిడ్ రోగులు నమ్మి మోసపోయారు.
అనేకులు ప్రాణాలు పోగొట్టుకున్నారు. సుప్రీం కోర్టు గతంలో ఇలాంటి ఆధార రహిత తప్పుడు ప్రకటనల ప్రచారం పై రామ్ దేవ్ బాబాను, బాలకృష్ణను కూడా తీవ్రంగా మందలించినప్పటికీ, కోర్టుకు క్షమాపణలుచెప్పి తప్పించుకొనప్పటికీ, రామ్‌దేవ్ బాబా బుద్ధులు, పద్ధతులు మారలేదు. కోర్టులో కూడా యోగిగా (కాషాయ వస్త్రాలు ధరించి) కపట నీతినే అనుసరించారు. ఇలాంటి వేషధారుల ప్రభావం సమాజానికి ఎంతటి హాని కలిగిస్తుందో మాటల్లో చెప్పలేము. రామ్‌దేవ్ విజయం వివాదాల నీడలో పెరిగింది. పతంజలి ఉత్పత్తుల సామర్థ్యాన్ని అతిశయోక్తిలతో చూపించారు. వారి ఉత్పత్తులు సర్వరోగ నివారిణిగా వినియోగదారులను తప్పుదారి పట్టించారు. ఈ వ్యాపార ప్రకటనలపై ఆయన ఇతర ఉత్పత్తుల సంస్థల నుండి విమర్శలను ఎదుర్కొన్నారు. షర్బత్ జిహాద్ వివాదం కేవలం మార్కెటింగ్ లోపం కాదు. ఇది ఒక లోతైన సమస్య లక్షణం.
మతాన్ని వ్యాపార లాభం కోసం ఆయుధంగా ఉపయోగించే రామ్‌దేవ్ చర్యలు భారతదేశ సామాజిక సామరస్యాన్ని చెడగొట్టేవిగా ఉంటాయి. ఆధ్యాత్మికత, రాజకీయాలు, వ్యాపారం మధ్య సున్నితమైన గీతలను మసకబార్చేవిగా ఉంటాయి. ప్రభావవంతమైన వ్యక్తుల నియంత్రణా అండదండలు ఉండటంతో గర్వం, నిర్లక్ష్యం, ఎవరూ ఏమీ చేయలేరు అనే ధీమా ఆయన ప్రవర్తనలో దృఢంగా పెరిగింది. సుప్రీం కోర్టు, ఢిల్లీ హైకోర్టు ఆయనను జవాబుదారీగా చేయడానికి చర్యలు తీసుకున్నప్పటికీ, ఇటువంటి చర్యలు సరిపోవు. ప్రకటనల నియంత్రణ, ద్వేషపూరిత ప్రసంగాలపై కఠిన శిక్షలు అవసరం. రామ్‌దేవ్ అనుచరులు కూడా ఆయన బోధనలు, విభజన చర్యల మధ్య వైరుధ్యాన్ని గుర్తించాలి. ఐక్యతను బోధించే గురువు విభజనను రెచ్చగొట్టడం ఆయన స్వంత వారసత్వాన్ని దెబ్బతీస్తుంది.
రామ్‌దేవ్ కథ ఒక హెచ్చరిక. యోగ బోధకుడి నుండి వ్యాపార దిగ్గజంగా ఎదిగిన ఆయన భారతీయ సంప్రదాయం పట్ల గౌరవాన్ని ఉపయోగించి సామ్రాజ్యాన్ని నిర్మించారు. కానీ, తప్పుదారి ఆరోగ్య దావాలు, సామాజిక విభజన రాగాల ద్వారా ఆయన విశ్వసనీయతను కోల్పోయారు. రూహ్ ఆఫ్జా ఘటన కేవలం ఒక పానీయం వివాదం కాదు; ఇది నీతి గీతలను దాటిన ఒక వ్యక్తి జవాబుదారీతనం గురించిన ప్రశ్న. భారతదేశం తన సంక్లిష్ట గుర్తింపును నిర్వహిస్తున్న తరుణంలో, సమాజాన్ని ఉద్ధరించే నాయకులు అవసరం. రామ్‌దేవ్, తన కాషాయం ఆకర్షణీయతా ముసుగు ఉన్నప్పటికీ, దాని ప్రభావం జవాబుదారీతనాన్ని అధిగమించినప్పుడు ఏమవుతుందో చెప్పలేం. ఇంకా కోర్టు నుండి తుది తీర్పు రావాల్సి ఉంది.
- కోలాహలం రామ్ కిశోర్, 98493 28496