రాష్ట్రంలోని మెడికల్ కాలేజీల అభివృద్ధి, బోధనా సిబ్బంది కొరతను అధిగమించేందుకు మరో 714 అసిస్టెంట్ ప్రొఫెసర్ పోస్టుల భర్తీకి ప్రభుత్వం ఆమోదం తెలిపింది. ఈ మేరకు ఆర్థిక శాఖ సంబంధిత ఫైల్‌ను క్లియర్ చేసింది. వైద్య కళాశాలల్లో ప్రభుత్వం తీసుకుంటున్న చర్యలను ఇటీవల నేషనల్ మెడికల్ కమిషన్ ప్రశంసించిన సంగతి తెలిసిందే. ఒక్క సీటు కూడా కోత పెట్టకుండా, ఒక్క రూపాయి జరిమానా విధించకుండా అన్ని ప్రభుత్వ మెడికల్ కాలేజీలకు అనుమతులు కొనసాగిస్తున్నట్టు ప్రకటించింది. దీంతో ప్రభుత్వ వైద్య కళాశాలల్లో పండగ వాతావరణం నెలకొంది.
కాగా మంత్రి దామోదర రాజనర్సింహ ఆదేశాలతో వేగం పెంచిన అధికారులు తాజాగా అసోసియేట్ ప్రొఫెసర్లకు, ప్రొఫెసర్లుగా పదోన్నతులు కల్పించింది. 33 స్పెషాలిటీ విభాగాల్లో 309 మందికి ప్రమోషన్లు కల్పిస్తూ వారికి పోస్టింగ్స్ ఇస్తూ జీవోలు కూడా విడుదల చేసిన సంగతి తెలిసిందే. వైద్య కళాశాలల్లో ప్రొఫెసర్ల కొరత తీరుస్తూ త్వరలో అసిస్టెంట్ ప్రొఫెసర్లకు, అసోసియేట్ ప్రొఫెసర్లుగా పదోన్నతులు ఇవ్వనున్నట్లు ప్రభుత్వం తెలిపింది. ఇటీవలే 607 అసిస్టెంట్ ప్రొఫెసర్ పోస్టులకు నోటిఫికేషన్ ఇచ్చిన మెడికల్ అండ్ హెల్త్ సర్వీసెస్ రిక్రూట్‌మెంట్ బోర్డు మరో 714 అసిస్టెంట్ ప్రొఫెసర్ పోస్టుల భర్తీకి ఆమోదం తెలుపడంతో వైద్య కళాశాలల్లో భోధన ప్రమాణాలు మెరుగుపడతాయని భావిస్తున్నారు.