ఆదివాసుల హక్కులకు ఏదీ రక్షణ?

ఆదివాసుల జీవన విధానం పర్యావరణం, అడవులు, అక్కడ ఉండే సహజ వనరులు మొదలైన వాటితో ముడిపడి ఉన్నది. కానీ నవీన సమాజం వారి హక్కుల నుండి దూరం చేసే సంక్షోభం నుండి వీరిని రక్షించాల్సిన అనివార్యత ఎంతైనా ఉంది. ఇప్పటికే 1994లో ఆగస్టు 9న ప్రపంచ ఆదివాసీ దినోత్సవంగా ప్రకటించడం జరిగింది. కానీ ఆదిమ జనుల హక్కులు, వాటి రక్షణే ధ్యేయంగా, ఆదివాసీల హక్కుల రక్షణకు, వారి అభివృద్ధికి తోడ్పాటు అందిస్తూ ఐక్యరాజ్య సమితి స్థానిక ప్రజలపై కొనసాగుతున్న హింస, దుర్వినియోగం మీద ‘UNITED NATIONS DECLARATION ON THE RIGHTS OF INDIGENOUS PEOPLES’ మానవ హక్కుల కౌన్సిల్ ఆదివాసీల హక్కుల రక్షణకై ఒక తీర్మానం జరగాలని సూచించింది. అప్పుడు మానవ హక్కుల కౌన్సిల్, యుఎన్‌ఒలు కలిసి ఆదివాసీల హక్కుల రక్షణకు తీర్మానించాయి. ఈ తీర్మానం 61/295 ప్రకారం జనరల్ అసెంబ్లీ -2007 సదస్సులో ప్రతి ఏటా సెప్టెంబర్ 13 తేదీని ప్రపంచ వ్యాప్తంగా ఆదివాసీ హక్కుల దినంగా జరుపుకోవాలని ప్రకటించింది.

దీనిని వర్కింగ్ గ్రూప్ సమావేశంలో చర్చించి ఆదివాసుల హక్కులు, భాషలు, సంస్కృతి, సాంప్రదాయాలు, ఆదివాసీలు వివక్షనుండి స్వతంత్రత పొంది శాశ్వతంగా స్వేచ్ఛ పొందడానికి అమలు చేయాల్సిన ముఖ్య అంశాలను వెల్లడించింది. యుఎన్‌ఒ 1982లో ప్రపంచంలోని ఆదివాసీలను విశ్వమానవులుగా గుర్తించినపుడు, వారికున్న ప్రత్యేక హక్కులను రక్షణ కల్పించాల్సిన బాధ్యతను ఈ హక్కుల దినోత్సవం గుర్తుచేస్తుంది. ఈ కమిటీ గుర్తించిన ముఖ్యమైన అంశాలు- రాజకీయ, సామాజిక, ఆర్థిక సాధికారత, సంస్కృతి, సాంప్రదాయాలు, చరిత్ర, వేదాంత శాస్త్రం, వారసత్వ భూమి హక్కులు, స్థానిక వనరులు, అలాగే అన్ని రకాల వివక్షలు మొదలైన వారి హక్కులను రక్షించాల్సిన అవసరం ఉందని, వాటిని గౌరవిస్తూ ప్రచారం చేయాల్సిన అవసరం ఉందని ఆ సమావేశంలో తీర్మానించిన అంశాలను వెల్లడించిన అంతర్జాతీయ మానవహక్కుల కౌన్సిల్‌ను అనుసరిస్తూ సెప్టెంబర్ 13ను అంతర్జాతీయ ఆదివాసీ హక్కుల దినోత్సవంగా గుర్తించడం జరిగింది. ఈ డిక్లరేషన్‌లో మొత్తం 46 ప్రకరణలు పొందుపరిచారు.

ఈ 46 ప్రకరణలలో ముఖ్యమైనవి మచ్చుకు కొన్ని. అధికరణ (1): ప్రపంచ మానవ హక్కుల చట్టం ప్రకారం, ఆదివాసీలు స్వేచ్ఛగా మానవ హక్కులు, ప్రాథమిక హక్కులను కలిగి, వాటిని ఆనందంగా అనుభవించాలి. ఎటువంటి వివక్షకు గురికావద్దు. అధికరణ (2): ఆదివాసీలు ఎటువంటి వివక్షలేకుండా ఇతరులతోపాటు సమానంగా హక్కులను అనుభవించాలి. అధికరణ (3): ఆదివాసీలు సంకల్పంతో వారి ఇష్ట ప్రకారం, రాజకీయ, ఆర్థిక, సామాజిక, సాంస్కృతిక అభివృద్ధికి తోడ్పడు అంశాలను వారి ఇష్టమైన రీతిలో నిర్వహించుకొని అభివృద్ధి చెందవచ్చు. అధికరణ (4): వీరు స్వయం ప్రతిపత్తి, స్వయం పాలనను వారి అంతరంగిక స్థానిక అంశాలలో నిర్వహించుకోవచ్చు. అదేవిధంగా ఆర్థిక వనరులు, సముపార్జనను వారు ఇష్టమైన రీతిలో నిర్వహించుకోవచ్చును. అధికరణ(5): ఆదివాసీలకు రాజకీయంగా, ఆర్థికంగా, చట్టాలను బలోపేతం చేసుకునే అధికారం కలదు.

అధికరణ(6): ప్రతి ఆదివాసీ ఏ దేశంలో నివసిస్తున్నప్పటికీ ఆదేశ పౌరసత్వం పొందే ఉండే హక్కును కలిగి ఉంటాడు. అధికరణ (7): ప్రతి ఆదివాసీ మానసిక సమగ్రతలో జీవితంలో స్వేచ్ఛ, రక్షణ హక్కును కలిగి ఎటువంటి మారణహెూమానికి గురికాకుండా, వ్యక్తిగతంగా, సమూహంగా, రక్షణతో కూడిన శాంతి, రక్షణ కలిగి బలవంతపు చర్యలు వీరిమీద, పిల్లల మీద లేకుండా ఉండే హక్కు. అధికరణ (8): జాతిపరంగా రెచ్చగొట్టేచర్యలు, వివక్ష ఉండకూడదు. వారి సంస్కృతి, సాంప్రదాయాలు రక్షణ కలిగి విలువలు కలిగి ఉండాలి. భూమిపై హక్కులు కాలరాయకుండా, వనరుల దోపిడీ జరగకుండా బాధ్యతాయుతమైన యంత్రాంగాన్ని ఆయా రాష్ట్రాలే కల్పించాలి. తెలుగు రాష్ట్రాల్లో ఆదివాసీ సమాజాలకు ఆగస్టు 9 ఆదివాసీ దినోత్సవం గురించి తెలిసినంతగా ఆదివాసీ హక్కుల దినం గురించి తెలియకపోవడానికి కారణం నేటి ప్రభుత్వాల అలసత్వం. ఐక్యరాజ్య సమితి సూచన మేరకు దేశ మంతటా ఆదివాసీల హక్కులకు ఆయా రాష్ట్ర ప్రభుత్వాలు రక్షణ కల్పించాలి.

Also Read : జిఎస్‌టి ఎగవేతదారులపై కొరడా

• గుమ్మడి లక్ష్మీనారాయణ, 91822 96576
• నేడు ప్రపంచ ఆదివాసీ హక్కుల దినోత్సవం