వాషింగ్టన్: పన్నుల్లో కోత, వ్యయ నియంత్రణలు, వీసా ఫీజులను పెంచే లక్షంతో అమెరికా ప్రభుత్వం ప్రతిష్ఠాత్మకంగా తీసుకువచ్చిన “వన్‌బిగ్ బ్యూటిఫుల్ బిల్లు” చట్టరూపం దాల్చిన విషయం తెలిసిందే. దీని ద్వారా వీసా దరఖాస్తుదారులపై అదనపు భారం పడనున్నట్టు తెలుస్తోంది. ముఖ్యంగా నాన్ ఇమిగ్రెంట్లకు కొత్తగా వీసా ఇంటిగ్రిటీ ఫీజును డిపార్టుమెంట్ ఆఫ్ హోమ్‌ల్యాండ్ సెక్యూరిటీ తప్పనిసరి చేసింది. అంతేకాకుండా 2026 నుంచి దీన్ని మరింత పెంచేలా నిబంధనలు రూపొందించారు. ఇమ్మిగ్రేషన్ సేవల సంస్థ ఫ్రాగోమెన్ నివేదిక ప్రకారం నాన్ ఇమిగ్రెంట్ వీసా జారీ చేసే సమయంలో వీసా ఇంటిగ్రిటీ ఫీజు కింద 250 డాలర్లు తప్పనిసరిగా చెల్లించాల్సి ఉంటుంది.
భవిష్యత్తులో ఈ రుసుమును పెంచే అధికారం డీహెచ్‌ఎస్‌కు కల్పించారు. వినియోగదారుల ధరల సూచీ (సీపీఐ ) ఆధారంగా 2026 నుంచి ఏటా దీన్ని పెంచే అవకాశం ఉంది. ఎట్టి పరిస్థితుల్లోనూ ఈ ఫీజును తగ్గించడం కానీ, రద్దు చేయడం కానీ ఉండదు. అయితే కొన్ని పరిమితులకు లోబడి డీహెచ్‌ఎస్ మినహాయింపు ఇవ్వనుంది. వీసాదారుడు వీసా నిబంధనలన్నీ కచ్చితంగా పాటించాలి. ఐ 94 గడువు ముగిసే ఐదు రోజుల కంటే ముందు (కొనసాగింపునకు లేదా స్టేటస్ మార్పు కోసం దరఖాస్తు చేసుకోకుండా ) అమెరికాను వీడే వారికి .. ఐ94 గడువు కంటే ముందే చట్టపరంగా కొనసాగింపు. శాశ్వత నివాస అనుమతి లభించిన వారికి మాత్రమే వీసా ఇంటిగ్రిటీ ఫీజు రీఫండ్ అవకాశం ఉంటుంది.
విదేశీ విద్యార్థులపై ప్రభావం..
అమెరికాలో చదువులు, ఉద్యోగం కోసం వచ్చేవారిపై ఈ చట్టం ప్రభావం చూపనుంది. ముఖ్యంగా అంతర్జాతీయ విద్యార్థులు, సాంకేతిక నిపుణులు, టూరిస్టులు, హెచ్1 బీ వీసాపై వచ్చే ఉద్యోగులకు ఆర్థికంగా కొంత భారంగా మారనున్నట్టు తెలుస్తోంది. వీసా ఇంటిగ్రిటీ ఫీజుతోపాటు ఐ94 , ఈఎస్‌టీఏ, ఈవీయుఎస్ ఫీజులు కూడా పెరగనున్నట్టు సమాచారం. శరణార్థులు కొత్తగా రెన్యువల్ కోసం దరఖాస్తు చేసుకునే వారిపైనా వీసా రుసుం భారం ఎక్కువగా కానున్నట్టు తెలుస్తోంది.