హీరో విశాల్, సాయి ధన్సికల నిశ్చితార్థం శుక్రవారం ఘనంగా జరిగింది. వారి ప్రేమ, పెళ్లి గురించి ఇప్పటికే అధికారిక ప్రకటన వచ్చిన సంగతి తెలిసిందే. కొంత కాలం క్రితం విశాల్, ధన్సిక ఇద్దరూ కూడా స్టేజ్ మీదే తమ ప్రేమ, పెళ్లికి సంబంధించిన విషయాల్ని ప్రకటించారు. ముందు చెప్పినట్టుగానే ఆగస్ట్ 29న ఈ ఇద్దరి పెళ్లికి అడుగులు పడి నిశ్చితార్థం జరిగింది. కుటుంబ సభ్యుల సమక్షంలో విశాల్, సాయి ధన్సికల నిశ్చితార్థాన్ని ఘనంగా నిర్వహించారు. ఈ మేరకు ఎంగేజ్‌మెంట్ ఫోటోల్ని విశాల్ సోషల్ మీడియా ద్వారా అభిమానులతో పంచుకున్నారు. “కుటుంబ సభ్యుల సమక్షంలో మా నిశ్చితార్థం ఘనంగా జరిగింది. అందరి ఆశీర్వాదం మాకు కావాలి” అంటూ సోషల్ మీడియాలో
విశాల్ చేసిన ట్వీట్, షేర్ చేసిన ఫోటోలు జోరుగా వైరల్ అవుతున్నాయి. విశాల్ ప్రస్తుతం ‘మకుటం’ అనే మూవీ షూటింగ్‌తో బిజీగా ఉన్నారు. విశాల్ కెరీర్‌లో 35వ చిత్రంగా రానున్న ఈ మూవీని సూపర్ గుడ్ ఫిలిమ్స్ బ్యానర్ మీద ఆర్‌బి చౌదరి నిర్మిస్తున్నారు. రవి అరసు దర్శకత్వం వహిస్తున్న ఈ సినిమా సముద్రపు బ్యాక్‌డ్రాప్, మాఫియా కథతో రూపొందుతోందని సమాచారం. ఇక త్వరలోనే పెళ్లికి సంబంధించిన ఇతర వివరాల్ని విశాల్ ప్రకటించనున్నారు. విశాల్, ధన్సిక ఎంగేజ్‌మెంట్ సందర్భంగా కోలీవుడ్, టాలీవుడ్ ప్రముఖులు వారికి శుభాకాంక్షలు తెలియజేశారు.