సినీరంగంలో బహుముఖ ప్రజ్ఞాశాలిగానే కాదు అన్నింటా తానై, అందరివాడుగా వెలుగొందిన దివంగత దర్శకరత్న దాసరి నారాయణరావు గురించి ఎంత చెప్పినా తక్కువే. అలాంటి అరుదైన వ్యక్తి జీవితం ఇప్పుడు వెండితెరకెక్కబోతోంది. ‘దర్శకరత్న’ పేరుతో ఆయన జీవితంలోని సంఘటనల సమాహారంతో రూపొందబోయే ఈ చిత్రాన్ని త్వరలో ప్రాంభించేందుకు సన్నాహాలు జరుగుతున్నాయి. ఇమేజ్ ఫిలింస్ పతాకంపై ధవళ సత్యం దర్వకత్వంలో తాడివాక రమేష్ నాయుడు నిర్మించే ఈ చిత్రం ముందస్తు నిర్మాణ పనులు శరవేగంగా జరుగుతున్నాయి.
ఈ సందర్భంగా హైదరాబాద్‌లో ఏర్పాటైన విలేకరుల సమావేశంలో చిత్ర యూనిట్ తో పాటు పలువురు సినీ ప్రముఖులు పాల్గొన్నారు. ఈ సందర్భంగా దర్శకుడు ధవళసత్యం మాట్లాడుతూ “చిత్ర పరిశ్రమలో మేరు శిఖరం అంత ఎత్తుకు ఎదిగి, రచయితగా, దర్శక, నిర్మాతగా ఎందరెందరికో మార్గదర్శకుడైన దాసరితో నాకున్న విడదీయలేని అనుబంధం ఈ చిత్రం చేసేందుకు నన్ను పురిగొల్పింది.
దాంతో నాకు తెలిసిన, ఆయన జీవితంలో నేను చూసిన అనేక సంఘటనలతో పాటు, ఆయనతో అనుబంధం ఉన్న అనేకమందిని సంప్రదించి ఈ చిత్రం స్క్రిప్ట్‌ను అద్భుతంగా రూపకల్పన చేయడం జరుగుతోంది. దీనిని ఓ గొప్ప చిత్రంగా తెరకెక్కించేందుకు తాడివాక రమేష్ నాయుడు ముందుకు రావడం అభినందనీయం”అని అన్నారు. చిత్ర నిర్మాత తాడివాక రమేష్ నాయుడు మాట్లాడుతూ “జాతీయ స్థాయి నటుడు ఈ చిత్రంలోని దాసరి పాత్రను పోషిస్తారు. అలాగే దాసరి పద్మ పాత్రలో గుర్తింపు ఉన్న నటి నటిస్తారు. తెలుగు, హిందీ, తమిళ వంటి ఇండియాలోని పలు భాషలలో ఓ పాన్ ఇండియా సినిమాగా ఎక్కడా రాజీ పడకుండా దీనిని రూపొందిచనున్నాం”అని చెప్పారు. ఈ సమావేశంలో సీనియర్ సంపాదకులు రామచంద్రమూర్తి, రేలంగి నరసింహారావు, ప్రసన్నకుమార్, మోహన్ వడ్లపట్ల, కాశీ విశ్వనాధ్, ఖాజా సూర్యనారాయణ, పి.రామకృష్ణగౌడ్ తదితరులు పాల్గొన్నారు.