Home తాజా వార్తలు ఆస్ట్రేలియా క్లీన్‌స్వీప్

ఆస్ట్రేలియా క్లీన్‌స్వీప్

Australia

 

చెలరేగిన లియాన్, రెండో టెస్టులోనూ పాక్ చిత్తు

అడిలైడ్: పాకిస్థాన్‌తో జరిగిన రెండో, చివరి టెస్టులో ఆతిథ్య ఆస్ట్రేలియా జట్టు ఇన్నింగ్స్ 48 పరుగుల తేడాతో ఘన విజయం సాధించింది. ఈ గెలుపుతో సిరీస్‌ను ఆసీస్ 20తో క్లీన్‌స్వీప్ చేసింది. డేనైట్ ఫార్మాట్‌లో జరిగిన ఈ టెస్టులో ఆస్ట్రేలియా పూర్తి ఆధిపత్యం చెలాయించింది. స్టార్ ఓపెనర్ డేవిడ్ వార్నర్ 335(నాటౌట్) ట్రిపుల్ సెంచరీతో కదం తొక్కడంతో ఆస్ట్రేలియా మొదటి ఇన్నింగ్స్‌లో 3 వికెట్ల నష్టానికి 589 పరుగుల భారీ స్కోరును సాధించి డిక్లేర్డ్ చేసింది. తర్వాత బ్యాటింగ్‌కు దిగిన పాకిస్థాన్ తొలి ఇన్నింగ్స్‌లో 302 పరుగులకే కుప్పకూలింది. తర్వాత ఫాలోఆన్ ఆడుతూ రెండో ఇన్నింగ్స్ చేపట్టింది. ఇందులో కూడా పాకిస్థాన్‌ను తక్కువ స్కోరుకే పరిమితం చేయడంలో ఆస్ట్రేలియా బౌలర్లు సఫలమయ్యారు.

స్టార్ స్పిన్నర్ నాథన్ లియాన్ ఐదు వికెట్లతో కదం తొక్కడంతో పాక్ రెండో ఇన్నింగ్స్‌లో 239 పరుగులకే ఆలౌటైంది. దీంతో ఆస్ట్రేలియా వరుసగా రెండో మ్యాచ్‌లోనూ ఇన్నింగ్స్ తేడాతో విజయాన్ని సొంతం చేసుకుంది. సోమవారం నాలుగో రోజు పాక్‌ను రెండో ఇన్నింగ్స్‌లోనూ ఆసీస్ బౌలర్లు కంగారెత్తించారు. లియాన్ అసాధారణ బౌలింగ్‌తో చెలరేగాడు. పాక్ బ్యాట్స్‌మెన్‌ను ముప్పుతిప్పలు పెట్టిన లియాన్ 69 పరుగులకే ఐదు వికెట్లు పడగొట్టాడు. లియాన్‌కు తోడుగా హాజిల్‌వుడ్ కూడా చెలరేగి పోయాడు. హాజిల్‌వుడ్‌కు మూడు వికెట్లు లభించాయి. ఇక, పాక్ జట్టులో ఓపెనర్ షాన్ మసూద్, అసద్ షఫిక్‌లు మాత్రమే మెరుగ్గా రాణించారు. కీలక ఇన్నింగ్స్ ఆడిన మసూద్ 8 ఫోర్లు, సిక్స్‌తో 68 పరుగులు చేశాడు.

మరోవైపు అసద్ షఫిక్ 57 పరుగులు సాధించాడు. మిగతా వారిలో వికెట్ కీపర్ మహ్మద్ రిజ్వాన్ 45, ఇఫ్తికార్ అహ్మద్ 27 పరుగులు మాత్రమే కాస్త రాణించారు. ఇక, పాకిస్థాన్ తొలి ఇన్నింగ్స్‌లో యాసిర్ షా (113) సెంచరీతో చెలరేగాడు. బాబర్ ఆజమ్ (97) తనవంతు పాత్ర పోషించాడు. కాగా, ఆసీస్ బౌలర్లలో స్టార్క్ ఆరు, కమిన్స్ మూడు వికెట్లు పడగొట్టారు. ఆస్ట్రేలియా తొలి ఇన్నింగ్స్‌లో డేవిడ్ వార్నర్ ట్రిపుల్ సెంచరీతో కదం తొక్కాడు. చారిత్రక ఇన్నింగ్స్ ఆడిన వార్నర్ 335 పరుగులతో అజేయంగా నిలిచాడు.

మరోవైపు లబుస్‌చగ్నె (162) అతనికి అండగా ఉన్నాడు. వీరిద్దరూ చెలరేగడంతో ఆస్ట్రేలియా భారీ స్కోరును నమోదు చేసింది. ఇదిలావుండగా రెండు మ్యాచ్‌ల సిరీస్‌లో భాగంగా జరిగిన మొదటి మ్యాచ్‌లో కూడా ఆస్ట్రేలియా జయభేరి మోగించింది. ఈ మ్యాచ్‌లో కూడా వార్నర్, లబుస్‌చగ్నెలు సెంచరీలతో జట్టును ఆదుకున్నారు. వరుసగా రెండు మ్యాచుల్లో నెగ్గిన ఆస్ట్రేలియా 20తో సిరీస్‌ను క్లీన్‌స్వీప్ చేసింది.

Australia win over Pakistan