Saturday, May 18, 2024

ట్రంప్‌తో ఏకాంతంగా గడిపా: కోర్టులో శృంగార తార సాక్ష్యం

- Advertisement -
- Advertisement -

న్యూయార్క్: అమెరికా మాజీ అధ్యక్షుడు డొనాల్డ్ ట్రంప్‌తో ‘ఏకాంతంగా’ గడిపానని శృంగార తార స్టార్మీ డేనియల్ పేర్కొన్నారు. ఈ విషయంపై బహిరంగంగా మాట్లాడకుండా ఉండేందుకు తనకు డబ్బులు కూడా ముట్టజెప్పారన్నారు. అధ్యక్ష ఎన్నికల సమయంలో తనపై వ్యతిరేకంగా మాట్లాడకుండా అడ్డుకోవడానికి ట్రంప్ అడ్డుదారులు తొక్కారనే ఆరోపణలపై విచారణ జరుగుతోన్న క్రమంలో న్యూయార్క్ కోర్టులో ఆమె వాంగ్మూలం ఇచ్చారు. ‘2006లో జరిగిన ఓ గోల్ఫ్ టోర్నమెంట్‌లో ట్రంప్‌ను తొలిసారి కలిశా.

ఆ తర్వాత ఓ బాడీగార్డ్ ద్వారా నన్ను డిన్నర్‌కు ఆహ్వానించారు. అనంతరం హోటల్ సూట్‌కు తీసుకెళ్లారు. ఆయన ఉద్దేశం ఏంటో అర్థమైంది. అక్కడ ఇద్దరం ఏకాంతంగా గడిపాం. ఆ తర్వాత పలుమార్లు భేటీ అయినప్పటికీ సన్నిహితంగా మెలగలేదు. మా సంబంధం గురించి ఎంతోమందికి తెలుసు” అని డేనియల్ వివరించారు. 2011లో ఓ బ్లాగ్ ద్వారా ఈ విషయం బయటపడిందని, 2016 ఎన్నికల సమయంలో 1,30,000 డాలర్ల మొత్తాన్ని ట్రంప్ న్యాయవాది మైఖేల్ కోహెన్ నుంచి స్వీకరించానని శృంగార తార తన వాంగ్మూలంలో పేర్కొన్నారు. అయితే ట్రంప్ నుంచి డబ్బులు వసూలు చేయడం తన ఉద్దేశం కాదన్నారు.

ఆమె చేసిన ఆరోపణలను ట్రంప్ తరఫున న్యాయవాదులు తోసిపుచ్చారు. కేవలం డబ్బుల కోసమే మాజీ అధ్యక్షుడిపై ఆమె తప్పుడు ఆరోపణలు చేస్తోందని వాదించారు. ఇలా సుదీర్ఘ సమయం ఇరు పక్షాల వాదనలు కొనసాగాయి. హష్ మనీకి సంబంధించిన కేసుపై న్యూయార్క్ న్యాయస్థానం కొన్ని రోజులుగా విచారణ చేస్తోంది. 13 వ రోజు వాదనలు కొనసాగాయి. ఇందులో భాగంగా ట్రంప్‌పై ఆరోపణలు చేసిన శృంగార తార స్మార్టీ డేనియల్, సాక్షం చెప్పేందుకు కోర్టుకు వచ్చారు. ఆ సమయంలో మాజీ అధ్యక్షుడు ట్రంప్ కూడా కోర్టు రూమ్‌లోనే ఉన్నారు. వాదనల సమయంలో తన న్యాయవాదులతో గుసగుసలాడుతున్నట్టు కనిపించిన ఆయన, ఆమె సాక్షం చెబుతున్న సమయంలో ట్రంప్ తన తలను ఊపుతున్నట్టు కనిపించారు. అది సాక్షులను బెదిరించడమే అవుతుందని ట్రంప్ న్యాయవాదులకు జ్యూరీ సభ్యులు సూచించారు.

- Advertisement -

Related Articles

- Advertisement -

Latest News