ఇడి వలలో తిమింగలం

హైదరాబాద్‌కు చెందిన
ముంబై టౌన్‌ప్లానింగ్ డిప్యూటీ
డైరెక్టర్ వైఎస్ రెడ్డి ఇళ్లు,
కార్యాలయాల్లో సోదాలు
రూ. 9.04కోట్ల నగదు,
రూ.23కోట్ల విలువైన
ఆభరణాలు, వజ్రాలు స్వాధీనం

మన తెలంగాణ/ హైదరాబాద్: ఎన్‌ఫోర్స్ మెంట్ డైరెక్టరేట్ దాడు ల్లో పెద్ద తిమింగలం చిక్కింది. హైదరాబాద్‌కు చెందిన వైఎస్ రెడ్డి ముంబైలో టౌన్ ప్లానింగ్ డిప్యూటీ డైరెక్టర్‌గా పని చేస్తున్నాడు. అ యితే బిల్డర్స్‌తో కుమ్మక్కై 41 భవనాలకు ఆయన అనధికారికంగా అనుమతులు ఇచ్చినట్లు ఆరోపణలు ఉన్నాయి. ఈ మేరకు వైఎస్ రెడ్డిపై ఇడి కేసు నమోదు చేసి దర్యాప్తు మొదలు పెట్టింది. ఇందులో భాగంగా గురువారం అతడి ఇంట్లో సోదాలు నిర్వహించింది. వైఎ స్ రెడ్డి ఇంట్లో నోట్ల కట్టలు, నగల గుట్టలు చూసి అధికారులు ఆశ్చర్యపోయినట్లు సమాచారం. కోట్ల విలువైన డాక్యుమెంట్లను కూడా అధికారులు గుర్తించినట్లు తెలిసింది. ముంబైకి చెందిన వసాయి విరార్ మున్సిపల్ కార్పొరేషన్ (వివిఎంసి) పరిధిలో వెలుగు చూసిన భారీ స్కామ్‌పై ఇడి దర్యాప్తును వేగవంతం చేసింది. ఈ కేసు దర్యాప్తులో భాగంగా గురువారం అధికారులు కీలక ముందడుగు వేశారు. ముంబై, హైదరాబాద్ నగరాలతో పాటు మొత్తం 13 ప్రాంతాల్లో ఏకకాలంలో విస్తృత సోదాలు నిర్వహించారు. దాడుల్లో భారీ మొత్తం లో నగదు, బంగారం, వజ్రాలను స్వాధీనం చేసుకున్నట్లు ఇడి ప్రకటించింది.

సుమారు రూ.9.04 కోట్ల నగదుతో పాటు, రూ.23.25 కోట్ల విలువ చేసే బంగారం, వజ్రాలు లభ్య మైనట్లు అధికారులు వెల్లడించారు. ఈ ఆస్తుల మొత్తం విలువ రూ.32 కోట్లకు పైగా ఉంటుందని అంచనా. ముంబైలోని మిరా భయాందర్ కమిష నరేట్ పరిధిలో ఈ అక్రమాలపై పలు కేసులు నమోదయ్యాయి. వీటి ఆధారంగా ఇడి మరో కేసు నమోదు చేసి దర్యాప్తు చేపట్టింది. ప్రభుత్వ, ప్రైవేటు స్థలాలను ఆక్రమించి, నిబంధనలకు విరుద్ధంగా 2009 సంవత్సరం నుంచి అక్రమ నిర్మాణాలకు అనుమతులు మంజూరు చేసినట్లు ఇడి గుర్తించింది. ఈ స్కామ్‌లో సీతారాం గుప్తా, అరుణ్ గుప్తా లనే వ్యక్తులు కీలక నిందితులుగా ఉన్నట్లు ఇడి పేర్కొంది. కొందరు అవినీతి అధికారులతో వీరు కుమ్మక్కై, ప్రభుత్వ స్థలాల్లో కూడా చట్టవిరుద్ధంగా నిర్మాణాలు చేపట్టి, అమాయక ప్రజలకు విక్రయించినట్లు ప్రాథమిక దర్యాప్తులో తేలిందని అధికారులు వెల్లడించారు. నిందితుల ఇళ్ల నుంచి పెద్ద ఎత్తున నగదు, బంగారు ఆభరణాలు స్వాధీనం చేసుకున్నట్లు ఇడి తమ ప్రకటనలో స్పష్టం చేసింది.