తెలంగాణ రాష్ట్ర అసెంబ్లీ సమావేశాలు శనివారం నుంచి ప్రారంభం కానున్నాయి. ఈ సభను రెండు రోజుల పాటు నిర్వహించాలని ముఖ్యమంత్రి రేవంత్ రెడ్డి ప్రభుత్వం భావిస్తోంది. ప్రొటెం స్పీకర్‌గా ఏఐఎంఐఎం సీనియర్ శాసనసభ్యుడు అక్బరుద్దీన్ ఒవైసీ నియమితులయ్యారు. కొత్తగా ఎన్నికైన ఎమ్మెల్యేలతో ప్రొటెం స్పీకర్ ప్రమాణం చేయిస్తారు. కొత్త స్పీకర్‌ను ఎన్నుకునే వరకు అక్బరుద్దీన్ ప్రొటెం స్పీకర్‌గా వ్యవహరిస్తారు. రాజ్‌భవన్‌లో ప్రొటెం స్పీకర్‌గా అక్బరుద్దీన్‌తో గవర్నర్ తమిసై సౌందరరాజన్ ప్రమాణం చేయిస్తారు. అనంతరం శాసనసభలో ఎమ్మెల్యేలతో ప్రమాణం చేయిస్తారు.
ప్రొటెం స్పీకర్ ఎవరన్నదానిపై ఇప్పటివరకు చర్చ సాగింది. సీనియారిటీ ప్రకారం మాజీ సీఎం కేసీఆర్ ప్రొటెం స్పీకర్‌గా వ్యవహరించాల్సి ఉంది. ఆయన 8 సార్లు శాసనసభకు ఎన్నికయ్యారు. అయితే అంతలోనే బాత్‌రూమ్‌లో జారిపడి గాయపడ్డాడు. ఆసుపత్రిలో చికిత్స పొందుతున్నాడు. సీనియర్ ఎమ్మెల్యేలలో పోచారం శ్రీనివాస్ రెడ్డి, దానం నాగేందర్, తలసాని శ్రీనివాస్ యాదవ్, ఏఐఎంఐఎం నేత అక్బరుద్దీన్ ఒవైసీలు ఉండగా, సీఎం రేవంత్‌రెడ్డి సర్కార్ 6వ సారి ఎమ్మెల్యే అక్బరుద్దీన్ ఒవైసీని ప్రొటెం స్పీకర్‌గా ఎంపిక చేసింది. కాంగ్రెస్‌లో ఆరుసార్లు ఎన్నికైన ఎమ్మెల్యేల్లో ఉత్తమ్‌కుమార్‌రెడ్డి, తుమ్మల నాగేశ్వరరావు ఉన్నారు. అయితే వారిద్దరూ మంత్రులుగా ప్రమాణం చేసిన విషయం తెలిసిందే.