ఆ రంగులతో హోలీ ఆడారో.. ఇక అంతే!

రంగుల పండుగ హోలీ. చిన్నా పెద్దా అంతా కలిసి హోలీ పండుగను ఎంతో ఉత్సాహంగా, సంబరంగా, ఆనందోత్సాహాల మధ్య జరుపుకుంటారు. ఒకరిపై ఒకరు నీళ్లు చల్లుకుంటూ, రంగులు పూసుకుంటూ తుళ్లుతూ, కేరింతలు కొడుతూ పండుగను ఆస్వాదిస్తారు. ఏడాదికోసారి వచ్చే ఈ పండుగ నాడు పిల్లల సంబరం అంబరాన్ని అంటుతుంది. అయితే హోలీ జరుపుకునేటప్పుడు కొన్ని జాగ్రత్తలు తీసుకోవడం అత్యంత అవసరం. లేకపోతే స్కిన్ ఎలర్జీ రావచ్చు. కళ్లు దెబ్బతినే ప్రమాదమూ ఉంటుంది.

• మార్కెట్లో రసాయనాలతో చేసే రంగులు కొని వాడకూడదు. వాటివల్ల చర్మం పాడవచ్చు. రసాయనాలతో చేసే రంగులు కళ్లలో పడటం ప్రమాదకరం. జుత్తు కూడా పాడయ్యే అవకాశం ఉంటుంది. వీటికి బదులు ఆర్గానిక్ రంగులను కొనడం మంచిది.
• శరీరానికి కొబ్బరి నూనె రాసుకుని హోలీ ఆడటం వల్ల రంగులు ఒంటికి పట్టకుండా ఉంటుంది. దానివల్ల చర్మం దెబ్బ తింటుందన్న బెంగ అక్కర్లేదు. జుత్తుకు కూడా నూనె పట్టించుకుంటే మంచిది.
• కళ్లలోకి రంగులు పోకుండా కళ్లద్దాలు ధరించాలి. టోపీ పెట్టుకుంటే జుత్తు పాడవకుండా ఉంటుంది.
• కొన్ని రకాల రంగులు దుస్తులకు అంటుకుని మరకలు పడతాయి. కాబట్టి పాత దుస్తులు వేసుకుని హోలీ ఆడటం మంచిది.
• ద్విచక్ర వాహనాలపై తిరుగుతూ రంగులు చల్లుకోవడం మంచిది కాదు. ఏక్సిడెంట్లు అయ్యే అవకాశమే కాకుండా, నీళ్లు ఇంజన్లోకి వెళ్లి బండ్లు పాడవుతాయి కూడా.
• ఉబ్బసం, ఉదర సంబంధిత వ్యాధులతో బాధపడేవారు రంగులు చల్లుకోకపోతేనే మేలు. అంతగా పండుగ జరుపుకోవాలనుకుంటే, మాస్క్ ధరించడం ఉత్తమం.

హోలీ ఆడాక, నాణ్యమైన షాంపూతో తలస్నానం చేయడం వల్ల తలకు అంటుకున్న రంగులు వదిలిపోతాయి.