తనదైన స్టైల్ కామెడీతో యూత్‌తో పాటు ఫ్యామిలీ ఆడియెన్స్‌కి ఆకట్టుకొనే సినిమాలు తీయడంలో దర్శకుడు అనిల్ రావిపూడి ముందుంటారు. ఇప్పటివరకూ ఆయన తీసిన సినిమాలు అన్ని బ్లాక్‌బస్టర్ హిట్స్‌గా నిలిచాయి. ఈ ఏడాది ‘సంక్రాంతికి వస్తున్నాం’ అనే సినిమాతో ప్రేక్షకుల ముందుకు వచ్చిన అనిల్.. ప్రస్తుతం మెగాస్టార్ చిరంజీవితో ఓ సినిమా చేస్తున్న విషయం తెలిసిందే. ‘మెగా 157’ (Mega 157) అనే వర్కింగ్ టైటిల్‌తో ఈ సినిమా తెరకెక్కుతోంది.
అయితే ఈ సినిమా గురించి ఓ ఆసక్తికర విషయం ప్రేక్షకుల ముందుకు వచ్చింది. గతంలో చిరంజీవి మాస్టర్, ఠాగూర్ చిత్రాల్లో లెక్చరర్ పాత్రలో నటించారు. కాగా, ఈ సినిమాలో (Mega 157) ఆయన స్కూల్ డ్రిల్ మాస్టర్ శివశంకర్ వరప్రసాద్ పాత్రలో కనిపించనున్నట్లు టాక్ బలంగా వినిపిస్తోంది. గురువారం ముస్సోరీలో ఈ సినిమా రెండో షెడ్యూల్‌లో స్కూల్ నేపథ్యంలోని సన్నివేశాలు చిత్రీకరించారట. ఈ షెడ్యూల్‌లో చిత్రంలోని ప్రధాన తారాగణం పాల్గొన్నట్లు తెలుస్తోంది.
కాగా, ఈ సినిమాను శ్రీమతి అర్చన సమర్పణలో షైన్‌ స్క్రీన్స్‌ పతాకంపై సాహు గారపాటి, సుష్మితా కొణిదెల నిర్మిస్తున్నారు. నయనతార హీరోయిన్‌గా నటిస్తున్న ఈ సినిమాలో వెంకటేష్ అతిథి పాత్రలో కనిపిస్తారని రూమర్స్ వస్తున్నాయి. హీరోయిన్ క్యాథరీన్ కూడా ఈ సినిమాలో కీలక పాత్ర పోషిస్తున్నట్లు తెలుస్తోంది. వచ్చే ఏడాది సంక్రాంతికి ఈ సినిమా విడుదల కానుంది.