అమోఘం,అద్భుతం శునకాల సాహస విన్యాసం
అట్టహాసంగా పోలీస్ జాగిలాలు పాసింగ్ అవుట్ పరేడ్
ఐ.ఐ.టి.సిలో 885 శునకాలకు తర్ఫీదు
మనతెలంగాణ/హైదరాబాద్ : తెలంగాణా పోలీస్ శాఖ ఆధ్వర్యంలో నిర్వహించే ఇంటిగ్రేటెడ్ ఇంటలిజెన్స్ ట్రైనింగ్ అకాడమీ (ఐ.ఐ.టి.సి) ఆధ్వర్యంలో శిక్షణ పొందిన 37 పోలీస్ జాగిలాల పాసింగ్ అవుట్ పరేడ్ శుక్రవారం అట్టహాసంగా జరిగింది. మొయినాబాద్ లోని జాగిలాల శిక్షణా కేంద్రంలో నిర్వహించిన ఈ పాసింగ్ అవుట్ పరేడ్ కు ఇంటలిజెన్స్ ఐజి నవీన్ చంద్ ముఖ్య అతిధిగా హాజరయ్యారు. ఈ సందర్భంగా ఐజి నవీన్ చంద్ మాట్లాడుతూ గత 16 ఏళ్ల క్రితం ప్రారంభించిన ఈ ఐ.ఐ.టి.సిలో ఇప్పటివరకు 885 శునకాలకు ప్రత్యేకమైన కఠోర దీక్షతో శిక్షణను అంద చేశామని తెలిపారు. హైదరాబాద్ లోని ఈ జాగిలాల శిక్షణా కేంద్రం దేశంలోని అత్యుత్తమ శిక్షణా కేంద్రాలలో ఒకటని వెల్లడించారు. రాష్ట్రం లోని ఎన్నో కీలక కేసులను ఛేదించడంలో పోలీస్ జాగిలాలు అందించిన సేవలు అమోఘమని ప్రశంసించారు.
అనంతరం సెక్యూరిటీ విభాగం ఐజి ఎంకె సింగ్ మాట్లాడుతూ ఇప్పటివరకు ఈ శిక్షణా కేంద్రం నుండి 19 బ్యాచ్ ల శిక్షణ పొందిన శునకాల పాసింగ్ అవుట్ పరేడ్ జరిగిందని తెలిపారు. విద్రోహ నివారణ, పేలుడు పదార్థాల గుర్తింపు, ప్రమాదకర ప్రాంతాలకు చేరుకోవడం, విఐపిల భద్రత, శాంతి భద్రతల పరిరక్షణలో పోలీస్ జాగిలాలు అత్యంత కీలకపాత్ర వహిస్తున్నాయని పేర్కొన్నారు. మొయినాబాద్ లోని శిక్షణా కేంద్రంలో కేవలం తెలంగాణా రాష్ట్రానికి చెందిన శునకాలు మాత్రమే కాకుండా ఇతర రాష్ట్రాల పోలీస్ శాఖలకు చెందిన శునకాలకు కూడా శిక్షణా నిస్తున్నామని అన్నారు. ఇటీవలే బీహార్ రాష్ట్రానికి చెందిన 20 జాగిలాలకు అక్రమ మద్యం గుర్తించే విధంగా ప్రత్యేక శిక్షణా నిచ్చామని తెలిపారు. మరో 25 శునకలకు కూడా శిక్షణా నివ్వాలని బీహార్ పోలీస్ శాఖ కోరిందని తెలియచేశారు. ఈ సందర్బంగా పాసింగ్ ఔట్ పరేడ్ కు హాజరైన అధికారులు శిక్షణా పొందిన జాగిలాలు వందన పరేడ్ స్వీకరించారు.
అకట్టుకున్న సాహస విన్యాసాలు
శిక్షణా పొందిన జాగిలాలు ప్రదర్శించిన సాహాస కృత్యాలు ఆకట్టుకున్నాయి. శిక్షణ పొందిన జాగిలాలు ఇతరులు పెట్టిన ఆహారాన్ని స్వీకరించక పోవడం, కేవలం తన శిక్షకుడు ఇచ్చే ఆహారాన్నే తినడం, పేలుడు పదార్థాలను వాసన తోనే గుర్తించడం, ఎన్నో బాక్సులున్నా ఒకే దానిలో ఉన్నబాంబుల గుర్తింపు, అంధులను రోడ్డు దాటించడం, ప్రమాదకర పరిస్తితుల్లోనూ ఉగ్రవాదులను పట్టుకోవడం, కేవలం తాడు పైనుండి వెళ్లి ఎత్తుపైనుండి దూకి విద్రోహస్థావరాలకు వెళ్లడం, మంటల నుండి, నీళ్ళనుండి దూకడం తదితర విన్యాసాలను జాగిలాలు ప్రదర్శించాయి. ఈ సందర్బంగా ఉత్తమ శిక్షణ పొందిన శునకాలకు, వాటి శిక్షకులకు మెడల్స్, ప్రశంశాపత్రాలు అందచేశారు. కార్యక్రమంలో సి.ఐ.ఎస్.ఎఫ్ డైరెక్టర్, అడిషనల్ డిజి సివి ఆనంద్, శిక్షణా సంస్థ ప్రిన్సిపాల్ తాజోద్దీన్ తదితరులు పాల్గొన్నారు.