Home తాజా వార్తలు ద్రోహులతో పొత్తా?

ద్రోహులతో పొత్తా?

Minister Harish Rao Fires on Congress Party

కాంగ్రెస్ వైఖరి జుగుప్సాకరం
కెసిఆర్ గెలపు ఖాయం, ప్రత్యర్థికి డిపాజిట్ దక్కకుండా చేయటమే లక్ష్యం
టిఆర్‌ఎస్ విస్తృత స్థాయి కార్యకర్తల సమావేశంలో మంత్రి హరీష్‌రావు

గజ్వేల్: పదవుల కోసం తెలంగాణను వదులుకున్న పార్టీ కాంగ్రెస్సైతే తెలంగాణ కోసం అధికార పదవులను వదులుకున్న పార్టీ టిఆర్‌ఎస్ అని  విజ్ఞులైన ప్రజలు గుర్తించాలని,  రానున్న ఎన్నికల్లో ప్రతిపక్షాలకు డిపాజిట్ దక్కకుండా చేసి టిఆర్‌ఎస్‌ను భారీ మెజారిటీతో గెలిపించాలని  ఆపద్ధర్మ మంత్రి హరీశ్‌రావు పిలుపునిచ్చారు. సోమవారం గజ్వేల్ శివాలోని ఈశ్వర సాయి కాటన్ మిల్ ఆవరణలో నిర్వహించిన మండల విస్తృత స్థాయి కార్యకర్తల సమావేశంలో ఆయన మాట్లాడారు. తెలంగాణ ద్రోహుల పార్టీ అయిన టిడిపితో పొత్తు పెట్టుకుంటున్న కాంగ్రెస్ పార్టీ సమర్థించుకుంటున్న తీరు చూస్తే జుగుప్సాకరంగా ఉందన్నారు.తెలంగాణ ప్రయోజనాలకు సంబంధించిన ఏ ఒక్క విషయంలోనైనా టిడిపి తన వైఖరిని వెల్లడించిందా అని మంత్రి కాంగ్రెస్‌ను ప్రశ్నించారు. ఆనాడు తెలంగాణకు ఒప్పుకున్న కారణంగానే టిడిపితో తాము పొత్తుపెట్టుకున్నామని మంత్రి చెప్పారు. అలాగే కాంగ్రెస్‌తో కూడా తెలంగాణ కోసమే పొత్తు పెట్టుకున్నామన్నారు. తాము ఏ పార్టీతో పొత్తు పెట్టుకున్నా తెలంగాణ కోసం షరతులతో పెట్టుకున్నామన్నారు. కానీ ఆ రెండు పార్టీలు చేసిన మోసంతో పదువులు గడ్డిపోచల్లా పడేసి స్వీయ అస్థిత్వం కలిగిన తెలంగాణ కోసం ఎన్నికల బరిలో నిలిచి గెలిచామన్నారు.

మరి ఇప్పుడు కాంగ్రెస్ పార్టీ ఎలాంటి షరతులతో ఇతర పార్టీలతో పొత్తు పెట్టుకుందో ప్రజలకు స్పష్టం చేయాలని కాంగ్రెస్ పార్టీని ఆయన డిమాండ్ చేశారు. బషీర్‌బాగ్‌లో  రైతులను పిట్టలను కాల్చినట్టు కాల్చి చంపిన పార్టీ పంచన చేరటానికి  కోదండరాంకు మనసెలా వచ్చిందో చెప్పాలన్నారు. ఏదేమైనా చంద్రబాబు ఆంధ్రా బాబే అన్నారు. అవకాశవాద రాజకీయాలతో ఇటు కాంగ్రెస్ అటు కోదండరాం పార్టీలు అమరావతికి సామంత రాజులుగా బతుకాలని చేస్తున్న కుయుక్తులను ప్రజలు తిప్పికొట్టాలన్నారు. తిరిగి ఢిల్లీ గులామ్‌లకు, అమరావతి సామంతుల చేతిలో తెలంగాణ పడితే మళ్లీ ఆనాటి అరాచక పాలనతో చీకటిరోజులు ప్రజలు అనుభవించాల్సి వస్తుందని అందుకే అప్రమత్తంగా ఉండి ఇంటి పార్టీ అయిన టిఆర్‌ఎస్‌ను గెలిపించాలన్నారు. కాళేశ్వరం ప్రాజెక్టు త్వరలో పూర్తిచేసి సాగునీటిని తెస్తామని రైతుల పొలాలు సస్యశ్యామలం చేస్తామన్నారు. రాష్ట్రంలోనే ఆదర్శ నియోజకవర్గంగా గజ్వేల్‌ను అభివృద్ది చేసిన కెసిర్‌న రానున్న కాలంలో మరెన్నో అభివృద్ధి పనులు చేయనున్నారన్నారు. టిఆర్‌ఎస్ రాష్ట్రంలో , గజ్వేల్‌లో కెసిఆర్ విజయం ఎప్పుడో ఖాయమైందని కేవలం భారీ మెజారిటీ లక్షంగా కార్యకర్తలు శ్రమించాల్సి ఉందన్నారు.

నిన్నటిదాకా పచ్చకండువాతో తిరిగి రాత్రికి రాత్రి దాన్ని కంద పడేసి మూడురంగుల కండువా కప్పుకున్న నాయకునికి కెసిఆరతో పోటీ పడే అర్హత , స్థాయి ఎక్కడిదన్నారు.  ఈ సమావేశంలో ఎంపి కొత్త ప్రభాకర్ రెడ్డి మాట్లాడుతూ టిఆరెస్ ప్రభుత్వం మళ్లీ అధధికారంలోకి రావటం ఖాయమన్నారు. గజ్వేల్ నియోజకవర్గంలో ప్రతిగ్రామానికి రూ.5 కోట్లకు పైగా నిధులు ఇచ్చి పలు అభివృద్ధి పనులు చేసిన  కెసిఆర్‌ను లక్ష ఓట్ల మెజారిటీతో గెలిపించి ఆ విజయాన్ని కానుకగా ఇవ్వటం మనందరి బాధ్యత అన్నారు. మనం చేసిన అభివృద్ధిని ప్రజలకు చెప్పుకుని ఓటడిగే హక్కు, ధైర్యం టిఆర్‌ఎస్ కార్యకర్తలకు నాయకులకే ఉందన్నారు. ఈ సమావేశంలో కార్పోరేషన్ ఛైర్మన్లు ఎలక్షన్ రెడ్డి, భూపతిరెడ్డి, భూమిరెడ్డి , గ్రంధాలయ సంస్థ ఛైర్మన్ లక్కిరెడ్డి ప్రభాకర్ రెడ్డి, డిసిసిబి చైర్మన్ చిట్టి దేవేందర్ రెడ్డి, డా. యాదవరెడి,్డ టిఆర్‌ఎస్వీ జిల్లా అధ్యక్షుడు మాదాసు శ్రీనివాస్, జడ్పీటిసి వెంకటేశం గౌడ్, ఎంపిపి చిన మల్లయ్య, నాయకులు దయాకర్‌రెడ్డి , రాములు, రవీందర్ రావు, తదితరులు పాల్గొన్నారు.