మధ్యాహ్నం 2గం.కు సిఎం కెసిఆర్ అధ్యక్షతన ప్రగతిభవన్‌లో సమావేశం
కొత్త మైనింగ్ పాలసీ, ఉద్యోగాల ఖాళీలపై సబ్ కమిటీ నివేదిక మున్నగు
కీలక అంశాలపై నిర్ణయాలు తీసుకునే అవకాశం
మన తెలంగాణ/హైదరాబాద్ : నేడు రాష్ట్ర మంత్రివర్గ సమావేశం జరగనుంది. ముఖ్యమంత్రి కె. చంద్రశేఖర్‌రావు అధ్యక్షతన మధ్యాహ్నం రెండు గంటలకు ప్రగతి భవన్‌లో ప్రారంభం అయ్యే ఈ సమావేశంలో వివిధ అంశాలపై చర్చించి…. పలు కీలక నిర్ణయాలు తీసుకోనుంది. ప్రధానంగా కొత్త మైనింగ్ పాలిసీ గ్రీన్ సిగ్నల్ ఇచ్చే అవకాశముందని తెలుస్తోంది. అలాగే ప్రభుత్వ ఉద్యోగాల్లో ఖాళీలపై వేసిన సబ్ కమిటి రూపొందించిన నివేదికపై మంత్రివర్గ సమావేశం కూలంకషంగా చర్చించనుంది. ఉద్యోగాలకు సంబంధించిన నోటిఫికేషన్ కూడా చర్చించే అవకాశం కనిపిస్తోంది. అలాగే అసెంబ్లీ సమావేశాల తేదీ ఖరారుతో పాటు ఎంపిక చేసిన నాలుగు నియోజకవర్గాల్లోని నాలుగు మండలాల్లో పైలెట్ ప్రాజెక్టుగా అమలు చేయనున్న దళిత బంధు పథకంపై రాష్ట్ర మంత్రివర్గం చర్చించనుంది. దీనికి కూడా కేబినెట్ ఆమోదముద్ర వేయనుంది.
అలాగే అత్యంత సుందరంగా, రమణీయంగా, భక్తిభావాన్ని పొంపొందించే విధంగా శరవేగంగా రూపుదిద్దుకుంటున్న యాదాద్రి ఆలయాన్ని ఎప్పుడు ప్రారంభించాలన్న అంశంపై రాష్ట్ర ప్రభుత్వం ఒక నిర్ణయానికి వచ్చే అవకాశం ఉందంటున్నారు. ఈ ఆలయ ప్రారంభోత్సవానికి ప్రధాని నరేంద్రమోడీ హాజరుకానున్న నేపథ్యంలో సంబంధిత ఏర్పాట్లపై కూలంకషంగా మంత్రివర్గ చర్చించనుంది. అలాగే వర్షాకాల శాసనసభ సమావేశాల తేదీని ఈ సమావేశంలో తేదీలను ఖరారు చేసే అవకాశముంది. అసెంబ్లీ సమావేశాల్లో ప్రవేశపెట్టే వివిధ బిల్లుల అంశంపై కూడా చర్చించనుంది. ఈ బిల్లుల్లో ప్రధానంగా హౌజింగ్ ఆర్డినెన్స్‌కు చట్టరూపం తెచ్చే అవకాశాలు ఉన్నాయని సమాచారం. అలాగే హర్టీకల్చర్ యూనివర్సిటీకి ఆర్డినెన్స్‌తో పాటు దళితబంధు పథకానికి చట్టబద్దత తదితర అంశాలపై మంత్రివర్గ సమావేశం కీలక నిర్ణయాలు తీసుకునుందని తెలుస్తోంది. ఈ అంశాలతో పాటు పంటలసాగు, వరి ధాన్యం సేకరణకు సంబంధించి కేంద్రం తీసుకున్న నిర్ణయంపై కూడా చర్చ జరిగే అవకాశముందని తెలుస్తోంది. వీటితో పాటు ఇంటర్ ఫస్టియర్ పరీక్షల నిర్వహణ, టీచర్ల హేతుబద్దీకరణ, హుజూరాబాద్ ఉపఎన్నిక తదితర అంశాలపై కూడా మంత్రివర్గ సమావేశం సమగ్రంగా చర్చించనుంది.