అందమైన టార్చర్‌, అద్భుతమైన లుక్ మమ్మల్ని ఇక్కడిదాకా తీసుకొచ్చాయని రెడ్‌ కార్పెట్‌ డిజిటల్‌ ప్రీ షోలో మార్క్ మాల్కిన్‌కి ఇచ్చిన వెరైటీ ఇంటర్వ్యూలో హీరో రామ్‌చరణ్‌ అన్నారు. రామ్ చరణ్‌ ఇప్పుడు గ్లోబల్‌ స్టార్‌. గోల్డెన్‌ గ్లోబ్‌ అవార్డుల్లో ఆయన అలాగే కనిపించారు. ఆయన లుక్ అద్భుతంగా అనిపించింది. వెరైటీ డిజిటల్‌ ప్రీ షోలో గ్రే కార్పెట్‌ మీద అద్భుతంగా కనిపించారు. ఎంత ఎదిగినా వినమ్రంగా ఉండటం రామ్‌చరణ్‌ నైజం.
ఎస్‌.ఎస్‌.రాజమౌళితో పాటు గోల్డెన్‌ గ్లోబ్‌కి వెళ్లిన రామ్‌చరణ్‌ అక్కడ వెరైటీ మార్క్ మాల్కిన్‌తో మాట్లాడారు. తమను భారతదేశం నుంచి గ్లోబల్‌ స్పేస్‌కి నడిపించిన అద్భుతమైన విషయాలను పంచుకున్నారు. వెరైటీ మార్క్ మాల్కిన్‌కి ఈ సినిమా మార్వెల్‌ మూవీని తలపించిందట. రామ్‌చరణ్‌ని చూస్తే మార్వెల్‌ యాక్టర్‌లాగా కనిపించారని ఆయన చరణ్‌తో ప్రస్తావించారు. మార్వెల్‌ స్టార్‌గా, సూపర్‌హీరోగా చేయాలనుకుంటున్నారా? అని రామ్‌చరణ్‌ని ప్రశ్నించారు. దానికి స్పందించిన రామ్‌చరణ్‌ ”తప్పకుండా. ఎందుకు చేయను” అని అన్నారు. తన ఫేవరేట్‌ మార్వెల్‌ స్టార్‌ కెప్టెన్‌ అమెరికా అని రామ్ చరణ్‌ అన్నారు.
మా భారతదేశంలోనూ అద్భుతమైన సూపర్‌హీరోస్‌ ఉన్నారు. వాళ్లల్లో ఒకరిని మళ్లీ ఇక్కడికి పిలిపిస్తే బావుంటుందేమో అని అన్నారు. నాటు నాటు పాట చిత్రీకరణలో, యాక్షన్‌ సీక్వెన్స్ లో ఎక్కువగా ఎవరు గాయపడ్డారు అని అడగగా దానికి స్పందించిన చరణ్‌ దాని గురించి మాట్లాడటానికి ఇప్పటికీ నా మోకాళ్లు వణుకుతున్నాయి. అయినా చేశాం. అది అందమైన టార్చర్‌. ఆ కష్టం, ఆ విధానం మమ్మల్ని ఇక్కడిదాకా నడిపించాయని అన్నారు. ఇక్కడ అందరి ముందు నిలుచుని మాట్లాడగలుగుతున్నామని అంటే దానికి కారణం అదే అని చెప్పారు.