బెట్టింగ్ యాప్ ప్రమోషన్ల కేసులో సోమవారం నటుడు దగ్గుబాటి రానా ఇడి విచారణకు హాజరయ్యారు. సోమవారం ఉదయం విచారణ కోసం హైదరాబాద్ నగరంలోని ఈడి కార్యాలయానికి వెళ్లారు. ఈ కేసులో బెట్టింగ్ యాప్ లపై ప్రమోషన్స కోసం తీసుకున్న పారితోషికంతోపాటు పలు విషయాలపై ఈడి అధికారులు రానాను ప్రశ్నిస్తున్నట్లు తెలుస్తోంది. కాగా నటులు, యాంకర్లు, సోషల్ మీడియా ఇన్‌ఫ్యూయెన్సర్లు, టీవీ హోస్ట్‌లతో సహా 29 మందిపై అక్రమ బెట్టింగ్ యాప్‌లను ప్రోత్సహించినందుకు ఇడి కేసు నమోదు చేసింది. ఈ కేసు జంగ్లీ రమ్మీ, ఎ23, జీట్‌విన్, పారిమ్యాచ్, టోటస్365 వంటి ప్లాట్ ఫామ్‌లకు చెల్లించిన ప్రమోషన్లపై నమోదైంది. 1867 పబ్లిక్ జూదం చట్టం కింద పంజాగుట్ట, మియాపూర్, సైబరాబాద్, సూర్యాపేటలతో పాటు ఆంద్రప్రదేశ్‌లోని విశాఖపట్నంలలో ఐదు వేరువేరు ఎఫ్‌ఐఆర్‌ను నమోయ్యాయి. ఈ కేసులో మనీలాండరింగ్ జరిగిందనే కోణంలో ఇడి అధికారులు దృష్టి సారించారు.
ఈ కేసులో ఎన్‌ఫోర్స్‌మెంట్ డైరెక్టరేట్(ఇడి) ఎన్‌ఫోర్స్‌మెంట్ కేస్ ఇన్షర్మేషన్ రిపోర్ట్ (ఇసిఐఆర్) నమోదు చేసింది. ఇందులో బాగంగా కేసులో ఉన్న నిందితులను వరుసగా ఇడి విచారిస్తోంది. ఇప్పటికే ఈ కేసులో నటులు ప్రకాశ్ రాజ్, విజయ్ దేవరకొండలను విచారించిన సంగతి తెలిసిందే.