ఈ వారం నాలుగు రోజులే ట్రేడింగ్
ముంబై : ఈ వారం అనేక అంశాలు స్టాక్‌మార్కెట్‌ను ప్రభావితం చేయనున్నాయి. అయితే దేశీయ స్టాక్ మార్కెట్ 2024-25 ఆర్థిక సంవత్సరానికి శుభారంభం చేసింది. కొత్త ఆర్థిక సంవత్సరం మొదటి వారంలో మార్కెట్ ఆల్ టైమ్ గరిష్ఠ స్థాయికి చేరుకుంది. ఏప్రిల్ 5తో ముగిసిన వారంలో నిఫ్టీ 0.84 శాతం లాభపడగా, సెన్సెక్స్ 0.81 శాతం లాభపడింది. వారం చివరి రోజున సెన్సెక్స్ 20.59 పాయింట్ల (0.028 శాతం) స్వల్ప పెరుగుదలతో 74,248.22 పాయింట్ల వద్ద ముగిసింది. కాగా నిఫ్టీ50 దాదాపు ఫ్లాట్‌గా 22,513.70 పాయింట్ల వద్ద ముగిసింది. ఇప్పుడు అనేక ముఖ్యమైన ఆర్థిక గణాంకాలు కొత్త వారంలో మార్కెట్‌ను ప్రభావితం చేయనున్నాయి.
ఏప్రిల్ 11న గురువారం ఈద్ సందర్భంగా సెన్సెక్స్, నిఫ్టీలో ట్రేడింగ్ ఉండదు. ఏప్రిల్ 12న మార్చి నెల రిటైల్ ద్రవ్యోల్బణం గణాంకాలు, పారిశ్రామికోత్పత్తి సూచీలు విడుదల కానున్నాయి. ఈ గణాంకాల ప్రభావం మార్కెట్‌పై కనిపించనుంది. ఫిబ్రవరి నెలలో రిటైల్ ద్రవ్యోల్బణం 5.09 శాతంగా ఉంది. ఈ వారం మార్కెట్లో కొత్త ఫలితాల సీజన్ కూడా ప్రారంభమవుతుంది. మార్చి 31తో ముగిసిన 2023-24 ఆర్థిక సంవత్సరంలో నాలుగో త్రైమాసికం(క్యూ4) ఫలితాలు వెలువడనున్నాయి. క్యూ4 కంపెనీల ఫలితాల సీజన్ అతిపెద్ద ఐటి కంపెనీ టిసిఎస్ ఫలితాలతో ప్రారంభమవుతుంది. టిసిఎస్ మార్చి త్రైమాసిక ఫలితాలు ఏప్రిల్ 12న విడుదల కానున్నాయి.
ఇతర అంశాలను పరిశీలిస్తే, కొత్త వారంలో భారతి హెక్సాకామ్ మార్కెట్లో లిస్ట్ కానుంది. ఈ వారంలో ఎస్‌ఎంఇ విభాగంలోనే 3 ఐపిఒలు రానున్నాయి. విదేశీ పోర్ట్‌ఫోలియో పెట్టుబడిదారులు ఆర్థిక సంవత్సరంలో కొనుగోలుదారులుగానే ఉన్నారు. అంతర్జాతీయంగా చూస్తే అమెరికాలో విడుదలైన ఆర్థిక గణాంకాలు, ముడి చమురు, డాలర్‌లో హెచ్చుతగ్గులు మార్కెట్‌పై ప్రభావం చూపవచ్చు.
మూడు వారాలుగా మార్కెట్ బూమ్
అంతకుముందు 2023-24 ఆర్థిక సంవత్సరం చివరి వారంలో సెన్సెక్స్, నిఫ్టీ 1-1 శాతం లాభపడ్డాయి. ఏప్రిల్ 5తో ముగిసిన వారం మార్కెట్‌కి వరుసగా మూడో బుల్లిష్ వీక్‌గా నిలిచింది. ఆర్థిక సంవత్సరం మొత్తం మార్కెట్ అద్భుతంగా పనిచేసింది. మార్చి 31తో ముగిసిన 2023-24 ఆర్థిక సంవత్సరంలో సెన్సెక్స్ దాదాపు 25 శాతం బలపడగా, నిఫ్టీ 28 శాతం లాభపడింది.