విక్టరీ వెంకటేష్ తన సినిమా ‘నారప్ప’ షూటింగ్‌లో పాల్గొంటున్న సంగతి తెలిసిందే. మార్చి నెలలోనే 70 శాతం షూటింగ్ ముగియగా.. మిగిలిన బ్యాలెన్స్ పార్ట్‌ను పూర్తి చేయడానికి హైదరాబాద్‌లో శరవేగంగా షూటింగ్ జరుపుతున్నారు. కాగా ఈ షెడ్యూల్‌లో చేస్తోన్న సీన్స్ సినిమాలోనే కీలకమైనవి అట. అయితే ఈ సీన్స్‌లోనే కీలక ఘట్టమైన ఓ సన్నివేశం షూటింగ్‌ను తాజాగా పూర్తి చేశారని తెలిసింది. ఈ కీలక ఘట్టం షూటింగ్‌లో వెంకీ సహా ముఖ్యమైన నటీనటులంతా పాల్గొన్నారు. ఇక లాక్ డౌన్‌కి ముందు రిలీజ్ చేసిన ఈ చిత్రంలోని వెంకీ లుక్‌కి అద్భుతమైన స్పందన వచ్చింది. ‘నారప్ప’గా విక్టరీ వెంకటేష్ లుక్ చాలా ఇంటెన్స్‌గా ఉంది. మాస్ గెటప్‌లో పూర్తి వైవిధ్యంగా కనిపిస్తూ ఆయన ఆకట్టుకున్నారు. కాగా తమిళ్‌లో బ్లాక్‌బస్టర్ హిట్‌గా సంచలనం సృష్టించిన ‘అసురన్’ చిత్రానికి ఇది రీమేక్. ఈ చిత్రాన్ని శ్రీకాంత్ అడ్డాల దర్శకత్వంలో సురేష్ ప్రొడక్షన్స్ ప్రై.లి, వి క్రియేషన్స్ పతాకాలపై డి.సురేష్‌బాబు, కలైపులి ఎస్. థాను సంయుక్తంగా నిర్మిస్తున్నారు.