లండన్ : కొవిడ్ 19 ను మొత్తం కట్టడి చేయగల వల్నేవా అనే కొత్త వ్యాక్సిన్‌కు బ్రిటన్ ఔషధ నియంత్రణ వ్యవస్థ గురువారం అనుమతించింది. ది మెడిసిన్స్ అండ్ హెల్త్ కేర్ ప్రోడక్ట్ రెగ్యులేటరీ ఏజెన్సీ (ఎంహెచ్‌ఆర్‌ఎ) ప్రపంచంలో ఈ వల్నేవా వ్యాక్సిన్‌ను అనుమతించడం ఇది మొదటిసారి అని పేర్కొంది.ఎంహెచ్‌ఆర్‌ఎ అధికారికంగా ఆమోదించిన ఆరో కొవిడ్ వ్యాక్సిన్‌గా ఈ వ్యాక్సిన్‌ను పేర్కొంది. ఈ వ్యాక్సిన్ వల్ల మొత్తం వైరస్ నిర్వీర్యమైపోతుందని, అందువల్ల కణాలకు సోకడం కానీ లేదా శరీరంలో ప్రతిరూపాలను సృష్టించడం కానీ జరగదు. భద్రత, నాణ్యత, సమర్థత పరంగా ఈ వ్యాక్సిన్‌ను పూర్తిగా సమీక్షించాకే అనుమతించడమైందని ఎంహెచ్‌ఆర్‌ఎ చీఫ్ ఎగ్జిక్యూటివ్ డాక్టర్ జునె రైనే పేర్కొన్నారు. ఆక్స్‌ఫర్డ్ ఆస్ట్రాజెనెకా , ఫైజర్/బయో ఎన్ టెక్ వ్యాక్సిన్ల మాదిరిగానే ఈ వ్యాక్సిన్ రెండు డోసులుగా రూపొందించడమైందని చెప్పారు.
18 నుంచి 50 ఏళ్ల లోపు వారికి ఈ వ్యాక్సిన్ వినియోగిస్తారు. రెండు డోసుల మధ్య 28 రోజుల వ్యవధి ఉంటుంది. ఫ్లూ, పోలియో వ్యాక్సిన్ల ఉత్పత్తిలో ఉపయోగించే ప్రక్రియనే వల్నేవా వ్యాక్సిన్ ఉత్పత్తిలో వినియోగించారు. ప్రతి వ్యాక్సిన్‌కు యాంటీబాడీ స్పందన వేర్వేరుగా ఉంటుంది. అయితే ఈ వల్నేవా వ్యాక్సిన్‌కు మాత్రం రెండుడోసులు తరువాతనే యాంటీబాడీల స్పందన కనిపిస్తుందని చెప్పారు. 2 నుంచి 8 డిగ్రీల సెల్సియస్ ఉష్ణోగ్రతలో ఈ వ్యాక్సిన్‌ను నిల్వ చేసుకోవచ్చు. అంటే ఇంటిలో ఉపయోగించే ఫ్రిజ్‌లో దీన్ని నిల్వ చేసుకోవచ్చు. స్కాట్లాండ్ లోని ఎడిన్‌బర్గ్ సమీపాన లివింగ్‌స్టన్ లోని వల్నేవా ఫ్యాక్టరీలో ఈ వ్యాక్సిన్ తయారౌతోంది.